«Չափերդ ճանաչիր, կսատկացնեմ, այ սրիկա». Ալավերդու համայնքապետն ու Արեն Մկրտչյանը վիճեցին
![](/timthumb.php?src=/disc/05-12-23/7539a2ad06bef06654b1dc7bc6d5fa94.jpg&w=708)
Համայնքի ղեկավարին պարտավոր են կես ժամ սպասել, որից հետո տեղակալը կվարի, կամ տարիքով մեծ ավագանու անդամը. նիստը սկսել են օրենքի խախտումով, քվեարկել են արդեն: Այս մասին, այսօր՝ դեկտեմբերի 5-ին, Ալավերդու համայնքապետարանի նիստերի դահլիճում լրագրողներին ասաց Ալավերդու համայնքի ղեկավար Արկադի Թամազյանը, ում այսօր ՔՊ-ն որոշել է անվստահություն հայտնել։
Հետո «Ապրելու երկիր» կուսակցության համահիմնադիր Մեսրոպ Առաքելյանը վերցրեց քվեատուփը՝ լրագրողներին ցույց տալու, որ արդեն քվեարկությունը տեղի է ունեցել, ինչից հետո լեզվակռիվ ու քաշքշուկ սկսվեց։ Ոստիկանները ուժով դուրս տարան Մեսրոպ Առաքելյանին։
Քվեատուփի հետ տեղի ունեցած միջադեպի պատճառով առաջարկվեց նախկին քվեարկությունը համարել անվավեր և քվեարկել երկրորդ անգամ:
Նշենք, որ սենյակում է նաև ԱԺ ՔՊ խմբակցության պատգամավոր Արեն Մկրտչյանը։ Վերջինիս և Թամազյանի միջև ևս լեզվակռիվ սկսվեց, վիրավորանքներ հնչեցին։ Ոստիկանները դուրս տարան նաև Թամազյանին։
Հիշեցնենք, որ Ալավերդու համայնքապետարանի շենքի մուտքի մոտ բողոքի ակցիան են իրականացնում Ալավերդի բնակիչներն՝ ի պաշտպանություն համայնքապետի։ Ոստիկանները թույլ չեն տալիս բնակիչներին շենք մուտք գործել:
«Ամո՛թ ձեզ, պարո՛ն Մկրտչյան, քո խոսքերի համար ժողովրդին ես պատասխան տալու։ Ամո՛թ քեզ, քո նմանին էլ պատգամավոր են ընտրել»,-դիմելով ՔՊ պատգամավոր Արեն Մկրտչյանին՝ ասաց համայնքի ղեկավարը։
Արեն Մկրտչյանն արձագանքեց. «Զոռբայությմբ հարց չի լուծվում, դավայ, դուրս արի ստեղից»:
«Չափերդ ճանաչիր, սրիկայի մեկը, կսատկացնեմ, այ սրիկա»,- արձագանքեց Թամազյանը:
Լարված իրավիճակից հետո, Արկադի Թամազյանի ինքնազգացողությունը վատացել է։ Շտապօգնություն է ժամանել։
Նշենք, որ այսօր Ալավերդի խոշորացված համայնքի ավագանու 27 անդամից 14-ը կայացած քվեարկությամբ անվստահություն հայտնեց համայնքի ղեկավար Արկադի Թամազյանին: Գաղտնի քվեարկությամբ համայնքապետ ընտրվեց ավագանու ՔՊ խմբակցության ղեկավար, Շնողի նախկին համայնքապետ Դավիթ Ղումաշյանը։