Փաստաբան Լևոն Գևորգյանին մեղադրանք է ներկայացվել
![](/timthumb.php?src=/disc/29-03-23/d3086d1d122295bd1e841e4623ffb026.jpg&w=708)
Միջազգային իրավունքի մասնագետ, փաստաբան Լևոն Գևորգյանին այսօր մեղադրանք է ներկայացվել՝ Հակակոռուպցիոն կոմիտեում քննվող քրեական վարույթի շրջանակներում։ Այս մասին տեղեկացնում է Հակակոռուպցիոն կոմիտեն։
Գևորգյանին մեղադրանք է ներկայացվել ՀՀ քրեական օրենսգրքի 436-րդ հոդվածի 2-րդ մասի 3-րդ կետով (կաշառք տալը՝ իր կամ իր մատնանշած անձի օգտին պաշտոնատար անձի կողմից թողտվության կամ հովանավորչության կամ այլ ապօրինի գործողության կամ անգործության համար)։ Նրա նկատմամբ որպես խափանման միջոց է ընտրվել բացակայելու արգելքը։
Նշենք, որ Լևոն Գևորգյանը միջազգային իրավունքի մասնագետ է, իրավաբանական գիտությունների թեկնածու, ներկայացուցչություն է իրականացնում միջազգային իրավական հարթակներում։ Նա բազմիցս բարձրաձայնել է միջազգային իրավական հարթակներում ՀՀ վարած սխալ քաղաքականության մասին, բազմիցս խոսել է Արցախի ինքնորոշման իրավունքի, Արցախի միջազգային ճանաչման հարցի նրբությունների մասին։
Հիշեցնենք, որ մարտի 22-ին ոստիկանությունը հայտնել էր, որ ժամը 01.25-ին ՀՀ ոստիկանության պարեկային ծառայության ծառայողները Հրազդանի կիրճում ստուգում կատարելու նպատակով կանգնեցրել են «Տոյոտա» մակնիշի աավտոմեքենա, որի վարորդը իր մոտ չի ունեցել վարորդական իրավունքի վկայական, ինչի համար ուղևորը 40.000 դրամ է առաջարկել պարեկային ծառայողներին:
«Ուղևորը կաշառք տալու հիմնավոր կասկածանքով ձերբակալել, բերվել է ոստիկանության Դավթաշենի բաժանմունք և կազմված փաստաթղթերի հետ ներկայացվել է նախաքննական մարմին»,- հայտնել էին ոստիկանությունից։ Դեպքի առթիվ ՔԿ-ում նախաձեռնվել է քրեական վարույթ՝ ՀՀ քրեական օրենսգրքի 436-րդ հոդվածի 1-ին մասով՝ կաշառք տալու հատկանիշներով, որը քննչական ենթակայությամբ փոխանցվել է ՀՀ հակակոռուպցիոն կոմիտեին։