Հովիկ Աբրահամյանի առանձնատան շքեղ ինտերիերը եւ փոփոխությունը՝ առուվաճառքի պայմանագրում (տեսանյութ, լուսանկարներ)
![](/timthumb.php?src=/disc/17-03-23/6394c9951148586378a3b0cfab780120.jpg&w=708)
Նախկին վարչապետ Հովիկ Աբրահամյանի՝ Հաղթանակի զբոսայգու դիմաց գտնվող առանձնատանն առնչվող գործարքները չեն դադարում՝ չնայած տունն անցնում է 2 քրեական գործով։ «Հետք»-ը պարզել է, որ առանձնատան վաճառքի պայմանագրում փոփոխություն է կատարվել, որի համաձայն՝ գնորդը գույքի արժեքի մեծ մասը պետք է վճարի մինչև 2024 թ․-ի ավարտը՝ նախկին 2022 թ․-ի օգոստոսի 1-ի փոխարեն։ Բացի այդ, «Հետքի» տրամադրության տակ են հայտնվել Հովիկ Աբրահամյանի ընտանիքի՝ մի քանի տարի կառուցած առանձնատան ներսը պատկերող լուսանկարները։
Երևանի Ազատության պողոտա 1/6 հասցեի տունը կառուցել է նախկին վարչապետ Հովիկ Աբրահամյանի ընտանիքը։ Առանձնատան սեփականատերը նախկին պաշտոնյայի որդին էր՝ Արգամ Աբրահամյանը։ Վերջինս նախորդ տարի` 2022 թ․-ին, տունը վաճառել էր նորահայտ գործարար Նարեկ Նալբանդյանի կնոջը՝ Լիլիթ Պետրոսյանին։ Ըստ civilnet.am-ի՝ գործարքի գինը 2.5 միլիարդ դրամ էր, որից 48 միլիոն դրամը կանխավճար է եղել, իսկ հիմնական մասը Նարեկ Նալբանդյանի կինը Արգամ Աբրահամյանին պետք է վճարեր մինչև 2022 թ․-ի օգոստոսի 1-ը։ Գործարարի կինը սահմանված ժամկետում չի վճարել 2 միլիարդ 452 միլիոն դրամը։ Այդ իսկ պատճառով 2023 թ․-ի փետրվարի 8-ին փոփոխություն է կատարվել առուվաճառքի պայմանագրում։
Նոր պայմանավորվածության համաձայն՝ Նարեկ Նալբանդյանի կինը Հովիկ Աբրահամյանի որդուն մինչև 2024 թ․-ի դեկտեմբերի 31-ը կվճարի 2 միլիարդ 452 միլիոն դրամ։ Այս ամենը տեղի է ունեցել ԱԱԾ-ի և Գլխավոր դատախազության լուռ համաձայնությամբ։
Մոնումենտի առանձնատների վերաբերյալ նախ 2018 թ․-ին էր քրեական գործ հարուցվել, որի հիմքում «Հետք»-ի՝ «Ընտրյալների թաղամասը» վերնագրով հետաքննությունն էր։ Հետո արդեն Աբրահամյանների՝ իրեղեն ապացույց ճանաչված առանձնատունը, քննիչի որոշմամբ թույլատրվել է վաճառել։ Այդ դեպքով ևս քրեական գործ հարուցվեց, որը, ըստ նախկին գլխավոր դատախազ Արթուր Դավթյանի, ԱԱԾ-ի վարույթում էր։
Գլխավոր դատախազությունից փորձեցինք պարզել, թե ո՞ր փուլում է այդ գործի նախաքննությունը, և խնդրեցինք պարզաբանել, թե ինչպե՞ս է հնարավոր եղել ևս մեկ քրեական գործի պայմաններում կրկին նույն անշարժ գույքի վերաբերյալ պետական նոր գրանցում իրականացնել (պայմանագրում կատարված փոփոխությունը հաստատվել է Կադաստրի կոմիտեում և պետական նոր գրանցում է կատարվել)։
Դատախազության՝ ԱԱԾ–ում մինչդատական վարույթի օրինականության նկատմամբ հսկողության վարչության ավագ դատախազ Մ․ Անտոնյանը գրավոր տեղեկացրել է, որ ԱԱԾ քննչական դեպարտամենտում շարունակվում է քրեական վարույթի նախաքննությունը:
Դատախազ Անտոնյանը միաժամանակ հայտնել է․ «2022 թվականի մարտի 30-ին վարույթն իրականացնող մարմինը որոշում է կայացրել Երևան քաղաքի Ազատության պողոտա 1/6 բնակելի տուն հասցեի հողամասը իրեղեն ապացույց ճանաչելու մասին, որը նույն օրը հանձնվել է տան սեփականատեր Լիլիթ Ռազմիկի Պետրոսյանի պատասխանատու պահպանությանը, ով պարտավորվել է պահպանել վերոհիշյալ անշարժ գույքը և այն չօտարել մինչև քրեական գործի քննության ավարտը։
2022 թ․-ի մարտի 31-ին վարույթն իրականացնող մարմինը գրություն է հասցեագրել ՀՀ կադաստրի կոմիտեի ղեկավարին, որով խնդրել է Երևան քաղաքի Ազատության պողոտա 1/6 բնակելի տուն հասցեում գտնվող հողամասի վերաբերյալ գործարքներ կատարելու մասին դիմում ստանալու դեպքում, մինչև գործարք կատարելը դրա մասին անհապաղ հայտնել վարույթն իրականացնող մարմնին»։
Փաստն այն է, որ գործարքի պայմանագրում փոփոխություն է կատարվել, եւ այն ստացել է պետական գրանցում։ Հարց է առաջանում, թե ինչպե՞ս է Դատախազությունն այս առանձնատան դեպքում փորձելու բռնագանձման պահանջ ներկայացնել Հովիկ Աբրահամյանի ընտանիքի անդամներից՝ ապօրինի ծագում ունեցող գույքերի բռնագանձման շրջանակում։ Կարելի է ենթադրել, որ ձևական այս գործարքով Նարեկ Նալբանդյանի կինը բարեխիղճ ձեռք բերող է հանդես գալու՝ խոչընդոտ հանդիսանալով հիշյալ առանձնատունը հօգուտ Հայաստանի բռնագանձելու գործում։
![](/disc/17-03-23/c473dcc239dca9ca157a098eb9b52239.jpg)
![](/disc/17-03-23/2301d3eeadba29f8e79f3d18cd90ba2b.jpg)
![](/disc/17-03-23/c364673845a32c8613ad8879f8385cca.jpg)
![](/disc/17-03-23/0b293bbdfb90f5df3ea8b0fb18990b6c.jpg)
![](/disc/17-03-23/02f3fac42816bbbe387a3063d1e4d9e1.jpg)
![](/disc/17-03-23/8240389a0e369fed8a820399546588fd.jpg)
![](/disc/17-03-23/b2e16272a72b6f689f350f55e9005698.jpg)
![](/disc/17-03-23/9825c56a8025f200b9d8342ae7839510.jpg)
![](/disc/17-03-23/0d3f6de2c66b94ff816cbda0cff66209.jpg)
![](/disc/17-03-23/41f51243bd46ef75c710176e036f04cd.jpg)
![](/disc/17-03-23/0fb375bdf917a3052593245f240e1d6e.jpg)
![](/disc/17-03-23/13f24e8aa02552b87a5f47c30bb2315c.jpg)
![](/disc/17-03-23/92833c5783a2031b8b7545f961e0be58.jpg)
![](/disc/17-03-23/c98e790425ecb314b2b7590f2e897d7b.jpg)
![](/disc/17-03-23/f8ddfc0560c44005f397db5783feea9d.jpg)