Զուգարանի թուղթ արտադրողներ՝ աշխարհը խելագարվել է

ԱՄՆ-ում զուգարանի թուղթ արտադրողները դժվարանում են բացատրել այն իրավիճակը, որը ստեղծվել է շուկայում, եւ կոչ են անում սպառողներին դադարեցնել զուգարանի թղթի կուտակումը, հայտնում է Americаru-ն։

Զուգարանի թղթի պատվերները սրընթաց աճում են, եւ արտադրողները փորձում են բավարարել պահանջարկը։ Ինչո՞ւ են մարդիկ պահեստավորում զուգարանի թուղթը։ Այս հարցին նույնիսկ զուգարանի թուղթ արտադրողները չեն կարողանում պատասխանել։ Իրականում նրանք տարակուսանքի մեջ են գնումների այդ քանակից։

Sellars Absorbent Materials-ի գլխավոր տնօրեն Թոմ Սելարսը կոչ է անում մարդկանց դադարեցնել խելագարությունը եւ մեծ քանակով զուգարանի թուղթ չգնել։ «Եթե դուք հարցնեք ինձ, թե ինչու են բոլորը հափշտակում զուգարանի թուղթը, ես չեմ կարող բացատրել։ Այնպիսի զգացողություն է, որ բոլորը ցնորվել են։ Սակայն պահանջարկի բռնկումը կարող է լարել մատակարարումների շղթան, հարկավոր է պարզապես հանգստանալ»,- ասել է նա։

Զուգարանի թղթի մյուս խոշոր արտադրողները նշել են, որ իրենց պատվերները կտրուկ աճել են, ու թեեւ իրենք հնարավոր ամեն ինչ անում են, որպեսզի ավելացնեն արտադրությունը, միեւնույն է, չեն հասցնում։