Արգենտինան դիմել է Ադրբեջանին՝ Ալի Խամենեիի խորհրդականին Բաքվում ձերբակալելու հարցով

Արգենտինան խնդրել է Ադրբեջանին ձերբակալել Իրանի գերագույն հոգևոր առաջնորդ այաթոլլահ Ալի Խամենեիի խորհրդական Ալի Աքբար Վելայաթիին՝ 1994 թվականին Բուենոս Այրեսում AMIA հրեական կենտրոնում պայթյունի գործի հետ կապված: Այս մասին տեղեկացնում է Minval.az-ը:

Վելայաթին պետք է մասնակցեր աշխարհի հոգևոր առաջնորդների երկրորդ գագաթնաժողովին, որը տեղի է ունենալու նոյեմբերի 14-15-ին Ադրբեջանի մայրաքաղաք Բաքվում: Վելայաթին Արգենտինայում տեղի ունեցած ահաբեկչության ժամանակ հանդիսանում էր Իրանի արտաքին գործերի նախարարը և, ըստ հաղորդման, մասնակցել է պայթյունի կազմակերպմանը: Այժմ նա Իրանի հոգևոր առաջնորդ Խամենեիի խորհրդականն է միջազգային հարցերով:

Արգենտինայի ներկայիս օրենսդրության համաձայն՝ մեղադրյալը պետք է իրավունք ունենա պաշտպանել իրեն դատարանի առաջ:

Նոյեմբերի 8-ին Արգենտինայի արտաքին գործերի նախարարն իր մոտ է հրավիրել Բուենոս Այրեսում Ադրբեջանի դեսպանին, փոխանցել է նրան Արգենտինայի կառավարության «խոր անհանգստությունը՝ կապված Վելայաթիի Բաքու կատարելիք այցի հետ» և առաջարկել է համագործակցել «Վելայաթիին ձերբակալելու և արտահանձնելու» գործում:

Ենթադրվում է, որ 1992 թվականին մեքենայի պայթյունը, որի հետևանքով Բուենոս Այրեսում ավերվեց Իսրայելի դեսպանատունը, նույնպես կազմակերպել է Իրանը: Այդ պայթյունի հետևանքով զոհվել է 29, վիրավորվել՝ 242 մարդ:

2007 թվականից իրանցիները համարվում են այդ պայթյունի գործով ամենաորոնվող հանցագործներն Ինտերպոլի կողմից: Վելայաթիի այցերի հետ կապված՝ Արգենտինան նմանատիպ խնդրանքով ավելի վաղ դիմել է Մալայզիային, Սինգապուրին և Ռուսաստանին, բայց ապարդյուն: