Յուրգեն Կլոպ․ Չեմ երազում Անգլիայի չեմպիոնի տիտղոսի մասին, բայց աշխատում ենք այդ ուղղությամբ

Չեմպիոնների լիգայի գավաթակիր, Անգլիայի փոխչեմպիոն «Լիվերպուլի» գերմանացի գլխավոր մարզիչ Յուրգեն Կլոպը պատմել է սպասելիքների մասին Լոնդոնի «Տոտենհեմի» հետ դիմակայությունից, որը տեղի կունենա Պրեմյեր լիգայի 10-րդ տուրում։ Թիմերը նախորդ անգամ հանդիպել են Չեմպիոնների լիգայի եզրափակիչում, «Լիվերպուլը» հաղթել է 2։0 հաշվով։

«Մրցակիցն իսկապես լավ թիմ է, բայց չի կարող փոխել Չեմպիոնների լիգայի եզրափակիչում տեղի ունեցածը։ Սակայն «Տոտենհեմը» դա կարող է դարձնել մոտիվացիայի աղբյուր այսօրվա խաղում։

«Տոտենհեմն» ունի բարձրակարգ խաղացողներ, բայց թիմը հիմա մի վիճակում է, որը անսպասելի է եւ վճռական է տրամադրված փոխել այս իրավիճակը։

Ոչ, ես չեմ երազում Պրեմյեր լիգայի չեմպիոնի տիտղոսի մասին, բայց աշխատում ենք այդ ուղղությամբ։ Ես չէի երազում նաեւ Չեմպիոնների լիգայի եզրափակիչի մասին, բայց մենք հաղթեցինք այդ խաղում։ Հիմա մեր թիմը գտնվում է ավելի լավ վիճակում, քան կարելի էր սպասել մրցաշրջանի մեկնարկից առաջ։

Մենք ստեղծել ենք ամուր հիմք, որի հետ պետք է աշխատել։ Ծանրագույն շրջանը դեռ առջեւում է։ Նոյեմբերին, դեկտեմբերին կլինի խելահեղություն։ Երբեմն մեր թիմը կունենա հաջողության կարիք, քանի որ չենք կարող ազդել ամեն ինչի վրա։ «Լիվերպուլը» պետք է պայքարի, ոչ մի երաշխիք չկա։ Բոլորը կարող են երազել, բայց ինչ-որ մեկը պետք է աշխատի»,- Կլոպի խոսքը մեջբերում է Sky Sports-ը։

«Լիվերպուլը» 9 խաղից հետո 25 միավորով առաջին տեղում է եւ 3 միավորի առավելություն ունի 10 հանդիպում անցկացրած «Մանչեսթեր Սիթիի» նկատմամբ։ «Տոտենհեմը» 12 միավորով 10-րդն է։

«Լիվերպուլ» - «Տոտենհեմ» հանդիպումը տեղի կունենա հոկտեմբերի 27-ին եւ կմեկնարկի Երեւանի ժամանակով 20։30-ին։