Խելքի պակասություն կամ դատարկամտություն

Հաղթել ուժեղ Բոսնիա եւ Հերցեգովինայի ուժեղ հավաքականին, հրաշալի հնարավորություն ստանալ պայքարել երկրորդ տեղի համար, որը թույլ է տալիս խաղալ Եվրոպայի առաջնության եզրափակիչ փուլում, լավ նվեր ստանալ բոսնիացիներից՝ ֆիններին հաղթելու տեսքով եւ այսքանից հետո վերցնել եւ ոչ-ոքի խաղալ Լիտենշտեյնի հավաքականի հետ՝ առնվազն խելքի պակասություն է կամ դատարկամտություն:

Եւ որեւէ մեկը թող չվիրավորվի, թող չնեղանա: Ունենալ հսկայական առավելություն գաճաճ Լիխտենշտեյնի նկատմամբ, խաղի սկսբում՝ 19-րդ րոպեին գոլ խփել, ունենալ հսկայական առավելություն ու երկրորդ խաղակեսում դաշտ դուրս գալ հաշիվ պահելու համար, ամենաքիչը հանցագործություն է:

Հայաստանի հավաքականը պետք է պատժվեր: պետք է պատժվեր նրա համար, որ Հենրիխ Մխիթարյանն իմանալով առաջիկա կարեւոր խաղերի մասին անիմաստ վնասվածք է ստանում ամենաանմեղ դիրքում, հավաքականի գլխավոր մարզիչը չի կարողանում ստեղծել հաղթական ոգի անգամ 1:0 հաշվով հաղթելու դեպքում:

Սա իսկական խայտառակություն էր: Սա իսկական ամոթ էր: Նման խաղով մենք ֆինների հետ որեւէ հաջողության հասնելու հնարավորություն չունենք: Ափսոս, իսկ ամեն ինչ այնքան լավ էր դասավորվում:

Տեսականորեն ոչինչ չի փոխվել: Մեզ ինչպես անհրաժեշտ էր հաղթել ֆիններին, այդպես էլ մնում է հաղթել, միայն թե հիմա գիտենք, որ այս կազմով, այս մտքով անգամ ոչ-ոքի չի կարող լինել:

Top-News.am