Ազատության հրապարակի ստորգետնյա ավտոկայանատեղին գործում է թերբեռնված, ներդրումների անհրաժեշտությունից ելնելով` կհայտարարվի մրցույթ

Երևանի ավագանին արտահերթ նիստին քննարկում է Երևան քաղաքի Ազատության հրապարակում գտնվող ստորգետնյա ավտոկայանատեղին հավատարմագրային կառավարման հանձնելու մասին որոշման նախագիծը, որը ներկայացրեց Երևանի քաղաքապետարանի զարգացման և ներդրումային ծրագրերի վարչության պետ Տիգրան Սարգսյանը:

Նա ներկայացրեց, որ նախագծով նախատեսվում է Երևան քաղաքի Ազատության հրապարակում գտնվող ստորգետնյա ավտոկայանատեղիի աշխատանքների կազմակերպումը հանձնել հավատարմագրային կառավարման՝ ելնելով ավտոկայանատեղիի գործունեության արդյունավետության բարձրացման և ներդրումների ներգրավման անհրաժեշտությունից:

Երևան քաղաքի փոքր կենտրոնը տրանսպորտային միջոցների կայանումից ազատելու և ստացիոնար կայանատեղեր ապահովելու նպատակով Երևան քաղաքի Ազատության հրապարակում կառուցվել է ստորգետնյա ավտոկայանատեղի, որը նախատեսված է շուրջ 500 ավտոմեքենայի համար:

Երևան համայնքի սեփականությունը համարվող Ազատության հրապարակի ստորգետնյա կայանատեղիի աշխատանքներն իրականացվում է «Երևանտրանս» ՓԲԸ-ի կողմից, որի պայմանագրի ժամկետը լրացել է, իսկ 2013-2018թթ. ֆինանսական ցուցանիշների համեմատական վերլուծությունը ցույց է տալիս, որ ավտոկայանատեղին գործում է թերբեռնված՝ հատկապես ձմռան ամիսներին:

Շուրջ 10 տարի առաջ տեղադրված գործող տեսահսկման համակարգն ունի արդիականացման խիստ անհրաժեշտություն: Համակարգի արդիականացման արդյունքում նախատեսվում է տեղադրել նոր, ժամանակակից տեսախցիկներ՝ որակական բարձր չափանիշներով, որը հետագայում կարող է օգտագործվել «Խելացի» կառավարման համակարգի շրջանակում: Նախատեսվում է ներդնել ավտոկայանատեղիի մուտքի և ելքի ավտոմատ կառավարման և վճարման համակարգ, ինչպես նաև կատարել վերանորոգման աշխատանքներ:

Նախատեսվում է ամբողջությամբ արդիականացնել լուսավորության համակարգը, ավտոկայանատեղիի զբաղվածությունը զգալիորեն մեծացնել: Հավատարմագրային կառավարման տրամադրման արդյունքում նախատեսվում է բարձրացնել կառավարման արդյունավետությունը, ներդնել զեղչային համակարգ, լայնորեն կիրառել էլեկտրոնային վճարման եղանակները, առաջարկել երկարաժամկետ և/կամ մեծ թվով մեքենաներ ունեցող բաժանորդների համար նախատեսված վճարային փաթեթներ:

Տիգրան Սարգսյանը նշեց, որ, ըստ որոշման, կթույլատրվի Երևանի քաղաքապետին՝ օրենսդրությամբ սահմանված կարգով հայտարարել մրցույթ՝ Երևան համայնքի սեփականություն համարվող Երևան քաղաքի Ազատության հրապարակում գտնվող ստորգետնյա ավտոկայանատեղին հավատարմագրային կառավարման հանձնելու վերաբերյալ:

«Իմ քայլը» խմբակցության անդամ Իզաբելլա Աբգարյանը հետաքրքրվեց, թե պայմանագրային կառավարիչը իրավունք կունենա՞ կայանման սակագինը փոխել և այդ տարածքը օգտագործել այլ նպատակով, Տիգրան Սարգսյանը պատասխանեց, որ վճարը հաստատվում է ավագանու կողմից յուրաքանչյուր տարվա համար ավագանու որոշմամբ և դա տեղական վճար է, և այս պահին գործում է որոշված չափը, ըստ որի՝ մեկ ժամվա համար երկու հարյուր դրամ, մեկ ամսվա համար` քսան հազար դրամ: «Ավտոկայանատեղիի հիմնական գործունեությունը կառավարիչը չի կարող փոխել, պարզապես նաև կարող է իրականացնել գործունեություն, որից եկած շահույթը կարող է բաշխվել Երևան համայնքի հետ»,-ասաց նա:

«Լույս» խմբակցության ղեկավար Դավիթ Խաժակյանը հարցրեց, թե հաշվի առնելով դրված չափորոշիչները՝ արդյոք ունե՞ն աչքի առաջ կազմակերպություններ, որոնք հնարավոր է, որ տեղավորվեն այս պայմաններում, և եթե կա հետազոտություն, քանիսն են դրանք: «Ի՞նչ քայլեր պետք է իրականացվեն, եթե մրցույթին մասնակցություն չցուցաբերվի»,-ասաց նա:

Տիգրան Սարգսյանը նշեց, որ որոշման նախագծում երկու նախապայման են նշել` շուրջ 300 միլիոն դրամի միջին հաշվարկային շրջանառություն և առնվազն երեք տարվա ոլորտի փորձ:

«Կարծում եմ, որ նման ընկերություններ կան և կարող են հայկական և օտարերկրյա կազմակերպությունները մասնակցել, մեր աչքի առաջ չունենք նման կազմակերպություն, բաց մրցույթ է լինելու»,-ասաց Տիգրան Սարգսյանը և նշեց, որ կարծում է մասնակցողներ կլինեն:

Որոշման նախագիծն ընդունվեց 40 կողմ և վեց ձեռնպահ ձայներով:

Այսպիսով` նշենք, որ մրցույթի հաղթողին որոշելու նպատակով հետևյալ էական պայմաններն են սահմանվում

. Պայմանագիրն ուժի մեջ մտնելուց հետո հավատարմագրային կառավարչի գործունեությունից առաջին, երկրորդ և երրորդ տարիների ընթացքում առաջացած շահույթից Երևան համայնքի մասնաբաժնի հետևյալ նվազագույն չափերը. ա. առաջին տարին՝ 77,000,000.0 (յոթանասունյոթ միլիոն) դրամ. բ. երկրորդ տարին՝ 85,000,000.0 (ութսունհինգ միլիոն) դրամ. գ. երրորդ տարին՝ 100,000,000.0 (հարյուր միլիոն) դրամ:

. Պայմանագիրն ուժի մեջ մտնելուց հետո հավատարմագրային կառավարչի գործունեության չորրորդ և հետագա տարիներին տարեկան շահույթից Երևանի քաղաքապետարանի մասնաբաժնի հետևյալ նվազագույն չափը. ընդհանուր շահույթի առնվազն 50 (հիսուն) տոկոսը, բայց ոչ պակաս, քան 100,000,000.0 (հարյուր միլիոն) դրամ:

. Առաջարկել Երևանի քաղաքապետին՝ Երևան համայնքի անունից մրցույթում հաղթող ճանաչված հավատարմագրային կառավարչի հետ կնքել հավատարմագրային կառավարման պայմանագիր, 10 տարի գործողության ժամկետով` հանդես գալով որպես հավատարմագրային կառավարման հիմնադիր: