Մեքենաների ներմուծման տուրքերի բարձրացումը կհանգեցնի անորակ մեքենաների ներկրման աճի. փորձագետ

Երրորդ երկրներից մեքենաների ներմուծման տուրքերի բարձրացումը կհանգեցնի անորակ մեքենաների ներկրման աճի։ Այս մասին մարտի 20-ին լրագրողների հետ հանդիպմանն ասել է «Սպառողների խորհրդատվության կենտրոն» հասարակական կազմակերպության նախագահ Կարեն Չիլինգարյանը։ Նա նշել է, որ ցածր գնով օգտագործված ներմուծվող մեքենաները երբեմն որակով ավելի բարձր են, քան ԵՏՄ տարածքում արտադրվող նոր մեքենաները։

Անդրադառնալով ծխախոտի արտադրանքի հնարավոր թանկացման հարցին՝ Չիլինգարյանը նշեց, որ հակածխախոտային նախագիծը կապված է ծխողների թիվը կրճատելու հետ, բայց փոփոխությունները սկզբում պետք է նպատակահարմար լինեն։ «Ծխախոտների կտրուկ թանկացումը կարող է հանգեցնել անլեգալ շրջանառության։ Այսինքն՝ դա կարող է հանգեցնել հակառակ արդյունքի, եւ մարդիկ կսկսեն ծխել պակաս որակյալ ծխախոտներ»,- բացատրել է ՀԿ ղեկավարը։

Անդրադառնալով գազավորված ըմպելիքների աքցիզային հարկ մտցնելուն՝ Կարեն Չիլինգարյանն ընդգծեց, որ խնդիրն այն է, որ առաջարկությունն արվել է առանց քննարկման։ «Երեկ տեղի ունեցավ հանդիպում Հայաստանի փոխվարչապետ Մհեր Գրիգորյանի հետ, որի արդյունքների հիման վրա ընդունվեց որոշում օրինագիծը չուղարկել խորհրդարան, քանի դեռ չեն անցկացվել քննարկումներ։ Սակայն դա կարելի էր անել մինչ այդ, որպեսզի բողոքի ալիք չառաջանար»,- նշել է նա։

Փորձագետն ավելացրել է, որ աքցիզային հարկերի մտցնումը գազավորված ըմպելիքների համար կհանգեցնի այն բանին, որ հայկական ապրանքները կդառնան պակաս մրցունակ ոչ միայն արտաքին, այլեւ անգամ ներքին շուկայում։