Ավիացիոն մասնագետները Փաշինյանին կոչ են անում ապահովել հավասար պայմաններ. Ստորագրահավաք է սկսվել (ֆոտո)

Ավիացիոն մասնագետների նախաձեռնող խումբը սկսել է ստորագրահավաք, որին արդեն միացել են ոլորտի բազմաթիվ ներկայացուցիչներ:

Մասնագետները նամակով դիմում են վարչապետ Նիկոլ Փաշինյանին եւ ԱԺ նախագահ Արարատ Միրզոյանին, որտեղ նշում են, որ ոլորտի վերականգնումն ու բնականոն զարգացումն ապահովելու համար անհրաժեշտ է իրականացնել համակարգային, ինստիտուցիոնալ, արմատական փոփոխություններ:

Մասնագետների կարծիքով պետությունը առաջնահերթ պետք է ապահովի կանխատեսելի, հավասար, մրցակցային պայմաններ: «Բարեփոխումների միջոցով ոլորտը պետք է դարձնել հրապուրիչ, և ինքնին կհայտնվեն բազմաթիվ ներդրողներ ավիացիոն ոլորտի ամենատարբեր բնագավառներում, այդ թվում նաև կծնվեն ոչ թե մեկ, այլ առնվազն մի քանի մրցունակ հայկական ավիափոխադրողներ»,- նշվում է նամակում:

Ստորագրահավաքին միացել են նաև տուրիստական գործակալությունների ներկայացուցիչները, քանի որ ոլորտում եղած թերությունները ազդում են տոմսերի գների դեմպինգի վրա: