Ոստիկանությունը NEWS.am–ի խմբագրությունում անօրինական գործողություն է իրականացրել

2018թ.-ի դեկտեմբերին կայացած ԱԺ արտահերթ ընտրությունների քարոզարշավի ժամանակ ԶԼՄ-ների նկատմամբ ճնշումների դեպքեր են գրանցվել: Այս մասին ասված է օրերս «Հայաստանի հելսինկյան կոմիտե» իրավապաշտպան հ/կ-ի հրապարակած՝ «Մարդու իրավունքները Հայաստանում 2018թ.-ին» զեկույցում։

«Ընտրություններից երկու օր առաջ՝ դեկտեմբերի 7-ին, ՀՀ ոստիկանության քրեական հետախուզության գլխավոր վարչության ներկայացուցիչը, ակնհայտորեն չարաշահելով իր լիազորությունները, անօրինական գործողություն է իրականացրել «NEWS.am» լրատվական կայքի խմբագրությունում։ Իրավապահները պահանջել են լրատվամիջոցից քաղաքական գործիչներից մեկի առցանց ելույթի բովանդակությունը հաստատող հիմքեր տրամադրել, ինչը ԶԼՄ- ների գործունեության իրավունքի և խոսքի ազատության ակնհայտ խախտում է»,– ասվում է զեկույցում։

Զեկույցում նշվում է, որ ավելի վաղ՝ նոյեմբերի 20-ին, նման անհիմն պահանջ էր ներկայացվել նաև «Aysor.am»-ի խմբագրությանը, երբ ոստիկանությունն այցելել էր խմբագրություն՝ պահանջելով գործարար Սիլվա Համբարձումյանի հարցազրույցի տեսաձայնագրության օրինակը:

Ընդհանուր առմամբ, ըստ զեկույցի, 2018 թ.-ին գրանցվել է լրագրողների ու օպերատորների նկատմամբ ֆիզիկական բռնությունների 21 դեպք, ԶԼՄ-ների և դրանց աշխատակիցների նկատմամբ ճնշումների թիվը 67 է, տեղեկություններ ստանալու և տարածելու իրավունքի խախտումներինը՝ 98։