Զավեն Անդրիասյանը՝ Սենթ Լուիսի մրցաշարի հաղթող

Հայաստանը ներկայացնող շախմատիստներ Հրանտ Մելքումյանը և Զավեն Անդրիասյանը մասնակցել են Սենթ Լուիսի մրցաշարին:

ԱՄՆ Սենթ Լուիս քաղաքում ավարտվեց Winter Chess Classic շախմատային փառատոնը, որի շրջանակում անցկացվում էին երկու շրջանային մրցաշարեր՝ A և B խմբերով: Հայաստանը ներկայացնող գրոսմայստեր Զավեն Անդրիասյանը B խմբում 9 հնարավորից վաստակեց 5.5 միավոր և Իսրայելը ներկայացնող գրոսմայստեր Վիկտոր Միխալևսկու հետ կիսեց 1-2-րդ տեղերը: Մրցաշարի հաղթողին որոշելու համար նշանակվեց թայ-բրեյք, որում մեր գրոսմայստերն ուժեղ գտնվեց իր մրցակցից:

Այս խմբում հաջող հանդես եկավ նաև պատանի գրոսմայստեր Արամ Հակոբյանը, ով 5 միավորով եզրափակեց լավագույն եռյակը:

Մրցաշարի A խմբի հաղթող դարձավ Կուբայի ներկայացուցիչ Պերես Յունիևսկին, ով վաստակեց 7 միավոր: Այս ենթախմբում հանդես եկող Հրանտ Մելքումյանը վաստակեց 5 միավոր և կիսեց 2-5-րդ հորիզոնականները: