«Ռոսսելխոզնադզոր»-ն արգելել է Ադրբեջանից և Իրանից 105 տոննա միրգ ներկրել Ռուսաստան

ՌԴ անասնաբուժական և ֆիտոսանիտարական հսկողության «Ռոսսելխոզնադզոր» դաշնային ծառայության Դաղստանի Հանրապետության վարչության տեսուչներն Ադրբեջանից և Իրանից բերված մշակաբույսային արտադրանքի մի քանի խմբաքանակ հետ վերադարձնելու որոշում են կայացրել: Այդ մասին տեղեկացնում է Interfax.az-ը:

«Արգելված ապրանքների թվում է հայտնվել մոտ 74.5 տոննա ընդհանուր ծավալով սալորի չորս խմբաքանակ, ինչպես նաև՝ սև թեյի ու դեղձի մեկական խմբաքանակ՝ յուրաքանչյուրը 12.5 և 18.5 տոննա: Ռուսական շուկա մուտք չգործած ապրանքների ընդհանուր ծավալն ավելի քան 105 տոննա է»,- ասվում է «Ռոսսելխոզնադզոր»-ի հայտարարությունում:

Նշվում է, որ վարակված մշակաբույսային արտադրանքը հայտնաբերվել է ՌԴ պետական սահմանի դաղստանյան հատվածում՝ «Յարագ Կազմալյար» անցակետում:

Աղբյուրի հաղորդմամբ՝ մասնագետների ստուգումների արդյունքում դրանցում վտանգավոր մոլախոտ և մշակաբույսերին վնաս հասցնող արևելյան ցեց է հայտնաբերվել:

 Այս բեռերի տերերը ենթարկվել են վարչական պատասխանատվության՝ ապրանքների ներմուծման վերաբերյալ օրենքները խախտելու համար: