Ճապոնիայի կառավարության աջակցությամբ վերանորոգվել է Հայաստանի ֆիզիկական կուլտուրայի և սպորտի պետական ինստիտուտի ձյուդոյի և կարատեի դահլիճը

Հայաստանի ֆիզիկական կուլտուրայի և սպորտի պետական ինստիտուտում Ճապոնիայի դեսպանության GCGP դրամաշնորհային ծրագրի շրջանակում տեղի ունեցավ ձյուդոյի և կարատեի վերանորոգված մարզադահլիճի հանդիսավոր բացման արարողությունը։

Միջոցառմանը ներկա էին Հայաստանի ֆիզիկական կուլտուրայի և սպորտի պետական ինստիտուտի ռեկտոր Տիգրան Սիմոնյանը, Հայաստանի Հանրապետությունում Ճապոնիայի արտակարգ և լիազոր դեսպան, Ն․Գ․ պարոն Յուտակա Աոկին, Կրթության, գիտության, մշակույթի և սպորտի նախարարի խորհրդական Արման Անդրիկյանը, ինստիտուտի ղեկավար կազմը, պրոֆեսորադասախոսական անձնակազմի ներկայացուցիչներ, ուսանողներ և հյուրեր։

Ներկաները շրջել և ծանոթացել են իրականացված աշխատանքներին և ուսանողների համար ստեղծված պայմաններին, դիտել ձյուդոյի և կարատեի մարզիկների ցուցադրական ելույթները։
Հայաստանի ֆիզիկական կուլտուրայի և սպորտի պետական ինստիտուտի ռեկտոր Տիգրան Սիմոնյանը շնորհակալություն է հայտնել Ճապոնիայի կառավարությանը և անձամբ ՀՀ-ում Ճապոնիայի դեսպանին դահլիճի վերանորոգման և կահավորման աշխատանքների համար տրամադրված դրամաշնորհի համար՝ նշելով, որ այն ոչ միայն հնարավորություն կտա ուսանողներին առավել արդյունավետ իրականացնելու իրենց մարզումները, այլև կամրապնդի երկու երկրների միջև կրթական ու մշակութային կապերը։

Դահլիճը ունի ժամանակակից տեխնիկական հագեցվածություն, կահավորված է արդիական մարզագույքով և լավագույնս ծառայելու է բուհի ուսանողների մարզական կարողությունների զարգացմանը։
Ռեկտորը կարևորեց մարզական ենթակառուցվածքների զարգացումը և դրանց ազդեցությունը երիտասարդների առողջ ապրելակերպի ձևավորման վրա։

«Նոր դահլիճը հնարավորություն կտա առավել արդյունավետ կերպով կազմակերպելու կրթական գործընթացը։ Այս նախաձեռնությունը ևս մեկ անգամ փաստում է, որ ՀՖԿՍՊԻ-ն շարունակում է ընդլայնել միջազգային համագործակցությունը՝ ուսանողներին առաջարկելով կրթական նոր հնարավորություններ»,- ընդգծեց ռեկտոր Տիգրան Սիմոնյանը։

Ըստ ՀՖԿՍՊԻ-ի ռեկտորի՝ այս իրադարձությունը ոչ միայն կրթական կամուրջ է Հայաստանի և Ճապոնիայի համար, այլև կարող է նպաստել դիվանագիտական հարաբերությունների ամրապնդմանը, ինչպես նաև ապահովել փոխադարձ հետաքրքրությունների ու համագործակցության զարգացումը։

Հայաստանի Հանրապետությունում Ճապոնիայի արտակարգ և լիազոր դեսպան, Ն․Գ․ պարոն Յուտակա Աոկին ընդգծել է, որ այս ծրագիրն իրականացվել է Ճապոնիայի կառավարության «Grassroots» մշակութային ծրագրերի դրամաշնորհային աջակցության շրջանակում։

«Շատ ուրախ եմ, որ Հայաստանի ֆիզիկական կուլտուրայի և սպորտի պետական ինստիտուտի բազմաթիվ ուսանողները յուրացնում են ճապոնական մարտարվեստների ոգին և ամեն օր ջանասիրաբար մարզվում»-ընդգծեց լիազոր դեսպան, Ն․Գ․ պարոն Յուտակա Աոկին ։
Շարունակելով խոսքը՝ դեսպանը նկատել է, որ երկու երկրներն ունեն բազմաթիվ ընդհանրություններ և խոր հարգանք են տածում իրենց ավանդույթների ու պատմության նկատմամբ։ Եզրափակելով ելույթը՝ դեսպանն իր երախտագիտությունն է հայտնել Հայաստանի ֆիզիկական կուլտուրայի և սպորտի պետական ինստիտուտի անձնակազմին և բոլոր նրանց, ովքեր իրենց ներդրումն են ունեցել այս ծրագրի իրականացման գործում։