Ո՞ւր կորավ «թանկարժեք քննիչ» Նազարյանը

Ըստ հասանելի տվյալների՝ 32-ամյա Նազարյանը զբաղվել է մի շարք ուշագրավ գործերով, եւ երբ Քննչական ծառայության ղեկավար Արգիշտի Քյարամյանը ՍՄՍ-ով հեռացավ պաշտոնից, եւ նշանակվեց Արթուր Պողոսյանը, այս քննիչը, ըստ տարբեր չճշտված տեղեկությունների, ոչ արդյունավետ աշխատանքի համար հեռացվեց աշխատանքից: Քննչական կոմիտեի խոսնակը՝ որից ակնկալվում էր գոնե տեխնիկական պարզաբանում, անհասանելի է։ Ու քանի դեռ պաշտոնական տեղեկություն չկա, հանրությունն ու մամուլը մնում են ենթադրությունների դաշտում։

Եվ այսպես, «Ժողովուրդ» օրաթերթը բացահայտեց, որ աշխատանքի արդյունավետությունը նկատելի է երիտասարդ քննիչ Նազարյանի հայտարարագրում. երկու բնակարան, շքեղ մեքենա՝ 2021 թ. Արտադրության Range Rover, որը, ըստ բաց աղբյուրների, արժե 75 հազարից մինչեւ 100 հազար ԱՄՆ դոլար։ Քննիչը կարողացել է գնել 2019 թ. արտադրության «Տեսլա» եւ նույն՝ 2023 թ.-ին, 8 մլն դրամով գնված մեքենան 22 մլն դրամով վաճառել է: Սակայն այդքան էժան «Տեսլա» ավտոշուկայի կայքերում չգտնվեց:

Տեղեկացնենք, որ քննիչ Նազարյանի հայրը ՀՀ ՊԵԿ երկարամյա աշխատակից է եղել. Արտաշես Նազարյանը զբաղեցրել է մոլիբդենով հարուստ Սյունիքի մարզի օպերատիվ ծառայության պետի պաշտոնը, ով ջերմ հարաբերությունները պահպանել է նաեւ ԶՊՄԿ-ի հետ:

«Ժողովուրդ» օրաթերթը տեղեկացավ, որ «Հանրապետություն» կուսակցության ընտրացուցակներում պարբերաբար ներկայացված նախկին դատախազի տեղակալ Բորիս Նազարյանն էլ «թանկարժեք քննիչի» հորեղբայրն է: Եվ կան լուրեր, որ Նազարյանը փորձում է իր զարմիկին տեղավորել դատախազության համակարգում:
Իհարկե, փորձեցինք նաեւ Նազարյաններին գտնել՝ մեկնաբանություններ ստանալու համար, բայց ապարդյուն»։

Մանրամասները՝ թերթի այսօրվա համարում