Վարդենիսում սպանված, բռնաբարված, անդամահատված կանանց նկարները մոռացե՞լ եք

Ադրբեջանի գլխավոր դատախազի տեղակալ Էլմար Ջամալովը հայտարարել է, որ քրեական գործ է հարուցվել՝ Հայաստանի կողմից, այսպես կոչված, հյուսիսային ադրբեջանցիների դեմ ցեղասպանության իրագործման, բռնի տեղահանման մեղադրանքներով։ Նա սպառնացել է, որ եթե Հայաստանը տարածաշրջանում խաղաղություն է ուզում, ապա պետք է դադարի ատել ադրբեջանցիներին։

Ադրբեջանի գլխավոր դատախազի տեղակալը, հավանաբար, նկատի ունի Խոջալուի օպերացիայի ընթացքում հենց ադրբեջանցիների կրակից սպանված մսխեթցի թուրքերի զանգվածային սպանությունը։
«Հրապարակի» հետ զրույցում «Արաբո» ջոկատի հրամանատար, ազատամարտիկ Մանվել Եղիազարյանն ասաց, որ Ադրբեջանի կողմից այս բոլոր քայլերն ուղղված են հայ տղամարդկանց նվաստացնելուն, հայ տղամարդու մեջ տղամարդկությունը սպանելուն, կոտրելուն։

«Ինչքան մենք թուլանանք, իրենք ավելի մեծ պահանջներ կներկայացնեն։ Մեր առաջին իշխանությունները թույլ էին՝ նրանք պատասխան չտվեցին Բաքվին, Սումգայիթին, իսկ քանի որ մերոնք թույլ են եւ ուզում են պարտվել, նրանք դեռ ուրիշ բաներ էլ են ներկայացնելու, 100 միլիարդ էլ են ներկայացնելու, պահանջելու են, որ 300 հազար ադրբեջանցիներ գան, 300 ասելու են՝ 600 հազար բերելու են»,- ասաց «Արաբո» ջոկատի հրամանատարը։

Մանվել Եղիազարյանը շեշտում է, որ թշնամու նպատակը մինչեւ վերջ Հայաստանը «քամելն» է, իսկ հայկական կողմը դրան պատրաստ է, չի ըմբոստանում, չի պատասխանում, ու, հետեւաբար, նրանց խոսքը հիմնավոր է դառնում, դե իսկ պահանջներն էլ շարունակելու են ներկայացնել։ 

Իսկ ո՞ւմ են հիմնական մեղավորներ կարգելու։ Եղիազարյանը կարծում է` այդպես են անելու, որպեսզի «տղամարդ» հասկացությունը, տղամարդ պատկերը Հայաստանում, հայ ժողովրդի մեջ ոչնչացնեն։ «Ներկայացնում են այդ մարդկանց հանցագործ, մարդասպան․ իրենք ավելի մեծ մարդասպաններ են՝ Վարդենիսում սպանված, բռնաբարված, անդամահատված կանանց նկարները մոռացե՞լ եք, բայց քանի որ մերոնք հաշտ ձեւով դրան գնում են, ադրբեջանցիներն էլ հայ ժողովրդի մեջ հայ տղամարդուն են սպանում, որ տղամարդու պատկեր գոյություն չունենա մեր ազգի մեջ՝ բոլորին ոչնչացնելու են։ Երեք նախագահներն աչքիս լույսը չեն, դուք գիտեք՝ ես 30 տարի ընդդիմադիր դաշտում եմ եղել, բայց այդ երեք նախագահներին կալանավորելը հայ ժողովրդին ստորացնել է։ Եթե այստեղ դատեն իրենց, համաձայն եմ ես, իրենց կեղծիքների, իրենց սրիկայությունների համար` եթե արել են, բայց եթե դա ադրբեջանցին է անում, դա բոլոր հայ տղամարդկանց է ստորացնում»,- նկատեց ազատամարտիկը։

Ադրբեջանցիները կազմակերպված ձեւով դա անում են, իսկ հայկական կողմը հաշտվել է այս իրողության հետ։ Պատճառն այն է, որ այն շրջանակները, որոնք պետք է հակազդեին այս հաշտեցման պրոցեսին, նրանք կամ պատրաստ են պարտության, մյուսները «կեղտերի մեջ կորած են», մի մասն էլ համագործակցել է թշնամու հետ, մյուսներն էլ վախից, վերգոների նման սիրտները կանգնած՝ պատրաստ են ամեն ինչ անել, միայն պատերազմ չլինի, ամեն ինչի պատրաստ են, միայն պատերազմ չլինի։ «Նրանք պատրաստ են վաճառել հայրենիքը, միայն թե իրենց մաշկը փրկեն, կա՛մ վաճառված են, կա՛մ վախեցած են, ցավոք սրտի։ Առաջին պատերազմի ժամանակ էլ մենք այս պատկերն ունեինք, բայց քանի որ այն ժամանակվա իշխանությունները մեզնից վախենում էին, զգուշանում էին բացահայտ հակահայկական քայլեր անելուց»,- եզրափակեց Արաբոյի Մանվելը։