Ադրբեջանի արձագանքը ոչ կառուցողական է. Վարդան Սարգսյան

Հայաստանից Արցախ ուղարկված հումանիտար օգնության բեռնատարները կանգնած են Կոռնիձորում, որևէ տեղաշարժ չկա, ճեպազրույցի ժամանակ այս մասին հայտարարեց ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը:

Այսօր այդ հատված էին մեկնել Հայաստանում հավատարմագրված դիվանագիտական կորպուսի ներկայացուցիչները:

Սարգսյանը նշեց` սա լավ հնարավորություն էր վերջիններիս համար, որ ականատես լինեն` չնայած ադրբեջանական պնդումներին, թե Լաչինի միջանցքը բաց է բեռների ու մարդկանց տեղաշարժի համար, փակ է:

Դիվանագետները հանդիպել են Արցախից Հայաստան եկած ու Լաչինի միջանցքի արգելափակմամբ պայմանավորված Արցախ վերադառնալու հնարավորություն չունեցող անձանց հետ:

Ադրբեջանից հնչող արձագանքները, Սարգսյանի խոսքով, կառուցողական չեն, հաճախ կրում են սադրիչ բնույթ:

«Որևէ դրական բան չեմ կարող ասել, պատասխանները ոչ կառուցողական են»,- ասաց նա: