Տաջիկստանի հետ սահմանին տեղի ունեցած բախումների հետևանքով Ղրղզստանի 34 քաղաքացի է զոհվել

Ղրղզստանի բնակիչների թիվը, որոնք զոհվել են Տաջիկստանի հետ սահմանին տեղի ունեցած հակամարտության ժամանակ, հասել է 34-ի: ՏԱՍՍ գործակալության փոխանցմամբ՝ այս մասին հայտնել են Ղրղզստանի առողջապահության և սոցիալական զարգացման նախարարությունից:

«Վերջին տվյալների համաձայն՝ տուժածների ընդհանուր թիվը կազմում է 173 մարդ, որից 34-ը մահացել են»,- հայտնել են հաղորդագրության մեջ: Ավելի վաղ գերեսչությունը հայտնել էր 33 զոհի մասին:

Նախարարության տվյալներով՝ 173 տուժածի շրջանում 31-ը զինվորականներ են, մեկը՝ բուժաշխատող, 131-ը՝ քաղաքացիական անձինք, մյուս 10-ի մասով դեռևս ճշտումներ են իրականացվում:

Հիշեցնենք, որ ղրղզ-տաջիկական սահմանին բախումներն սկսվել են ապրիլի 28-ին: Հակամարտության պատճառը ջրաբաշխիչ կետի պատկանելության շուրջ երկու հարևանների միջև վիճաբանությունն է եղել, որը շարունակվում է տասնամյակներ։ Տաջիկստանի և Ղրղըզստանի պետական սահմաններն անցնում են հենց այդ ջրաբաշխիչ կետի կողքով, իսկ 1968 թվականից ի վեր այն օգտագործվում է ինչպես Տաջիկստանի և Ղրղըզստանի, այնպես էլ երրորդ հարևան Ուզբեկստանի սահմանամերձ շրջանների ոռոգման և ջրամատակարարման համար։