ԱԺ արտահերթ ընտրության օրը նշանակում է ՀՀ նախագահը. Սահմանադրագետ

ԱԺ-ի արձակման պարագայում արտահերթ ընտրությունները դե յուրե նախագահի հրամանագրով են նշանակվում: Այդ մասին Aysor.am-ի հետ զրույցում ասաց սահմանադրագետ Գոհար Մելոյանը՝ մեկնաբանելով վարչապետի հայտարարությունը, որ հունիսի 20-ին Հայաստանում կանցկացվեն արտահերթ խորհրդարանական ընտրություններ:

Գոհար Մելոյանն ընդգծեց՝ նախագահը ձեռնպահ չի կարող մնալ ընտրության նշանակումից:

«Երկրի սահմանադրական կարգը մի քանի անգամ տապալած բարձրաստիճան պաշտոնատար անձը՝ վարչապետը, հերթական անգամ հանցավոր ինքնավստահություն է դրսևորում ու մի շարք իրավակարգավորումներ ենթադրող պրոցեսի վերաբերյալ հայտարարություն է անում: Այս գործընթացում ներգրավված են լինում Աժ խմբակցությունները, ԿԸՀ-ն: Փաստացի որպես սուբյեկտ, ընտրության օրը նշանակում է ՀՀ նախագահը, փաստորեն, վարչապետը կարողանում է հանցավոր ինքնավստահություն դրսևորել և ընտրության հստակ օրվա մասին բարձրաձայնել», - նկատեց Մելոյանը:

Գործընթացը ներկայացնելով, նա նշեց, որ վարչապետը հրաժարականի դիմում է ներկայացնում, 7 օր անց, եթե որևէ թեկնածու չի ներկայացվում, այլ մարդ չի ընտրվում որպես վարչապետ, 14 օրը սպառելուց հետո, օրենքի ուժով ԱԺ-ն արձակվում է և նշանակվում են արտահերթ ընտրություններ:

«Այս պարագայում արդեն չեմ կարող ասել՝ իրենց որտեղի՞ց այդ հանցավոր ինքնավստահությունը: Իրավականության շրջանակում ամբողջապես չի տեղավորվում, թե ինչպես են հաշվարկել, որ ընրտության օրը հունիսի 20-ն է», - նշեց սահմանադրագետը: