Կապանցիներ. «Վարչապետը եկալա, ըսկի թոշակի անուն էլ չի հոլովալ, ինչու՞ Սերժի ցույցին գնամ»
«Ոչ մի քաղքական ուժի հետ հույս չեմ կապում, ոչ էլ ընտրության եմ գնալու: Գնամ ի՞նչ անեմ, սաղ խաբում են մեզ: 48 տարի սվառկա եմ արել, 48 հազար թոշակ են տալիս. գնամ, ու՞մ ընտրեմ: Ղեկավարությունը խաբում է, մի ղեկավար եղե՞լ է, որ գյուղացուն, բանվորին օգնի»,- մեզ հետ զրույցում, Կապանի կենտրոնական հրապարակում բողոքում է 48 տարվա եռակցողի աշխատանքային ստաժ ունեցող Ռազմիկ պապը, սակայն նրան ընդհատում է համաքաղաքացի մի կին ու հորդորում.
«Սխալ ես անում, պիտի գնաս, ինչո՞ւ ես թողնում, որ քո ձայնը գողանան, ուրիշին տան, գնա, պայքարի: Հաստատ բոլորը չեն կարող նույնը լինել, հաստատ բոլորը ՀՀԿ-ի նման մարդուն չեն ատի»,- խորհուրդ է տալիս կապանցի մի կին:
Կապանը, թեեւ Սյունիքի մարզկենտրոնն է, բայց խնդիրներով, դարդ ու ցավով չի զիջում մարզի մյուս մեծ ու փոքր քաղաքներին: Գործազրկություն, արտագաղթ, գնաճ, քաղաքային անբարեկարգ փողոցներ, բակեր, մի խոսքով՝ «հայկական աղքատություն». Կապանում բնակիչներն այսպես են նկարագրում քաղաքի հիմնախնդիրները:
Կապանը աչքի է ընկնում գործազրկության եւ աղքատության բարձր ցուցանիշերով: Ազգային վիճակագրական ծառայության պաշտոնական տվյալների համաձայն՝ այս քաղաքում աղքատ է բնակչության 30 տոկոսը:
Նախընտրական քարոզչության այս շրջանում կապանցիներից հետաքրքվում ենք, թե ինչպիսի՞ ակտիվություն են դրսեւորում պատգամավորի թեկնածուների ծրագրերին ծանոթանալու համար:
«Սերժի համար ցույցի չեմ գա, Սերժի համար կապանցին ակտիվ չէ: Ցավդ տանեմ, ես չեմ վախենում ասել, որ Սերժը խաբել է, խաբում է եւ էլի է խաբելու: Սրանից հետո ինչպե՞ս ակտիվանամ Սերժի համար: Անցած անգամ էլ Րաֆֆի Հովհաննիսյանին եմ ընտրել, այս անգամ էլ եմ իրան ընտրելու»,- ասում է 77–ամյա կապանցի Էռնա Մանուկյանը, իսկ երբ նշում եմ, որ Սերժ Սարգսյանը ծնունդով Սյունիքի մարզի Տեղ գյուղից է, մի՞թե իր ծննդավայրի քաղաքացիներին բարի աչքով չի՞ նայում, Կապանում այսպես են պատասխանում.
«Ես իմ հույսերը կապում եմ Րաֆֆի Հովհաննիսյանի, մեկ էլ՝ Ծառուկյանի հետ»,- նշում է տիկին Էռնան:
Սերժ Սարգսյանի կառավարման ռեժիմը մեծ հիասթափություն է առաջացրել նաեւ կապանցիների մոտ: Այստեղ հստակ են որոշել՝ ընտրելու են ցանկացած ուժի, բացի ՀՀԿ-ից:
«Իշխանության հետ ի՞նչ հույսեր կապեմ, իշխանությունը մինչեւ հիմա կործանել ա երկիրը: Նայենք, կարողա Ծառուկյանը ինչ-որ բան անի»,- կարծում է Խաչիկ Մնացականյանը:
«Ծառուկյանն ա, Րաֆֆի Հովհաննիսյանն ա, Օհաննյան ա, իրանց եմ հավատում, էն մյուսների հետ գործ չունեմ: Ասել են, որ թոշակներն ավելացնելու են: Սերժին ինչի՞ հավատամ, վարչապետը եկալա, ըսկի թոշակի անուն էլ չի հոլովել: Ասում են՝ կբարելավենք, հլա 10 տարի է սպասում ենք, որ բարելավեն, բայց էլ ե՞րբ…»,- ՀՀԿ-ի եւ Սերժ Սարգսյանի ոչ վաղ անցյալում տրված ու չիրականացրած խոստումները հիշելով ասում է Շավարշ Նահապետյանը:
Կապանցու մեջ մի փոքր հույս արթնացնում են ընդդիմադիր քաղաքական ուժերը: Շատերը հարազատ-բարեկամներ ունեն Ռուսաստանի Դաշնությունում, բազմիցս են մեկնելու առաջարկներ ստացել, բայց ասում են՝ ապրիլի 2-ից հետո, եթե Սերժ Սարգսյանի ռեժիմը վերարտադրվի, անմիջապես լքելու են Հայաստանը:
Կապանում մեծամասնությունը չի խուսափում անուններ նշելուց, նրանք իրենց հույսերը կապում են «Ծառուկյան դաշինքի» եւ «Օհանյան-Րաֆֆի-Օսկանյան» դաշինքների հետ:
«Միայն Ծառուկյանի հետ եմ գնալու, տեսել ես ինչ սիրուն, խելքով, շնորքով, ժողովրդական մարդ է: Իշխանության հետ գործ չունեմ»,- ասում է Սամվել Հակոբյանը:
«Իշխանությունները ի՞նչ են արել, բոլոր երիտասարդներն էլ Ռուսաստանում են, այստեղ գործ չկա, ապրելամիջոց չկա: Հիմա Սեյրան Օհանյանի ծրագրերն եմ նայում, միգուցե սիրտս ուզի իրան ընտրեմ: Ընդդիմությանն եմ ընտրելու, որովհետեւ իշխանության մեջ փոփոխություն չեմ տեսել: Ես իմ հույսերը ամենալավ քաղաքական ուժի հետ եմ կապում, կարող ա «Համախմբումը» կարողանա մի բան անել»,- իր ընտրությունն արդեն կատարած համարելով ասում է Գարեգին Հայրապետյանը:
Կապանցիներից շատերը, թեեւ իրենց հիմնական հույս-հավատը կապում են «ՕՐՕ» եւ «Ծառուկյան» դաշինքների հետ, բայց կան նաեւ քաղաքացիներ, ովքեր ցանկանում են իշխանության գլխում կանգնած տեսնել բոլոր 8 քաղաքական ուժերին, բայցի Հայաստանի հանրապետական կուսակցությունից:
«Բացի Հանրապետականից, որ քաղաքական ուժը ուզում է, թող անցնի՝ դեմ չեմ: 5 միլիոն վարկ ունեմ, չեմ կարողանում փակեմ, տունս ուզում են ձեռքիցս առնեն, ամիսը 150 հազար դեղերի փող եմ տալիս, բայց ստանում եմ 50 հազար թոշակ: Դրա համար թող պատահականը հաղթի, բացի Սերժից»,- կյանքի դառնությունը աչքերով արտահայտելով ասում է Մերուժան Դավթյանը:
Կապանում այդպես էլ չհանդիպեցինք մի քաղաքացու, ով ցանկանում էր ՀՀԿ-ին քվե տալ: Կամ ՀՀԿ-ն ձայն չունի կամ էլ ՀՀԿ-ին քվեարկողները փողոցում չեն քայլում կամ էլ ամաչում են ասել, թե ում են ընտրելու:
Դավիթ Գասպարյան, Կապան