«Դենիս» փոթորկի հետևանքով հեղեղվել է Ջորջ և Ամալ Քլունիների` 12 մլն դոլար արժողությամբ շքեղ առանձնատունը (լուսանկարներ)

Միացյալ Թագավորությունում «Դենիս» փոթորկի հետևանքով հեղեղվել է հոլիվուդյան դերասան Ջորջ Քլունիի և նրա կնոջ՝ լիբանանա-բրիտանացի իրավաբան Ամալ Քլունիի՝ Անգլիայի Բերքշիրի կոմսությունում գտնվող 12 մլն դոլար արժողությամբ շքեղ առանձնատունը, որոնց արբանյակային լուսանկարները երեկվանից մեծ տարածում են գտել համացանցում, գրում է Daily Mail-ը:

Թեմզա գետը դուրս է եկել ափերից՝ ջրի տակ առնելով հոլիվուդյան զույգի թենիսի կորտը, ծածկապատշգամբը և մարգագետինների մեծ մասը:

Աղբյուրի հաղորդմամբ՝ տունը կառուցվել է 17-րդ դարում: Շքեղ առանձնատունն ավելի վաղ տուժել էր 2016 թվականին տեղի ունեցած ջրհեղեղից։

Հոլիվուդյան աստղն ու մարդու իրավունքների պաշտպանն իրենց երկվորյակների հետ այդ առանձնատուն են տեղափոխվել 2016 թվականին՝ 18-ամսյա ինտենսիվ վերանորոգումից հետո:

Քլունին առանձնատունը ձեռք է բերել 2014 թվականի սեպտեմբերին՝ 7,5 մլն դոլարով:

Օդերևութաբանները տեղեկացնում են, որ այսօր սպասվում են առատ տեղումներ, որոնք կարող են հանգեցնել ավելի մեծ հեղեղումների: