«Ես պատմություն կերտեցի». 120 000 դոլար արժողությամբ «արվեստի գործ» բանանը կերած վրացին մեկնաբանել է արարքը

Ծագումով վրացի արվեստագետ Դավիթ Դաթունան, որն օրեր առաջ միջազգային լրատվամիջոցների ուշադրության կենտրոնում էր հայտնվել Մայամիում Art Basel ժամանակակից արվեստի ցուցահանդեսի շրջանակում 120 000 դոլարանոց բանանն ուտելու համար, մեկնաբանել է իր արարքը:

Ինչպես նշում է Daily Mail-ը, Դաթունան մանրամասնել է, որ կպչուն ժապավենով սպիտակ պատին ամրացված սովորական բանանը, որը գնվել էր 120 000 դոլարով, կերել է քաղցած լինելու պատճառով:

«Այն սովորական համ ուներ, բայց արժեր այն ուտել, քանի որ ես այդ արարքով պատմություն կերտեցի»,-պատմել է Դաթունան, որը միջոցառման այցելուների զարմացած հայացքների ներքո կերել է «արվեստի գործը»:

Վրացու համոզմամբ՝ իր արածն ամենևին էլ վանդալիզմի ակտ կամ արվեստի գործի հեղինակի՝ իտալացի Մաուրիցիո Կատելանի նկատմամբ անհարգալից դրսևորում չէր:

«Ես նրան շատ եմ հարգում, նա աշխարհում լավագույններից է: Կարծում եմ՝ սա պատմության մեջ առաջին դեպքն է, երբ մի արտիստն ուտում է մյուսի կոնցեպտը: Ուստի՝ դա վանդալիզմ չէր, այլ արտ փերֆորմանս՝ իմ կողմից: Ներկայացումը կկոչեմ «Քաղցած արվեստագետը»»,-ասել է Դաթունան: