Ջենիֆեր Լոպեսը հայտնել է, որ երկրպագուների հետ սիրալիր լինելու պատասխանատվություն է զգում

Մոլորակի ամենասեքսուալ կանանցից մեկը համարվող հայտնի երգչուհի, դերասանուհի, պարուհի և պրոդյուսեր Ջենիֆեր Լոպեսը Los Angeles Times-ի հետ զրույցում հայտնել է, որ երկրպագուների հետ սիրալիր լինելու պատասխանատվություն է զգում:

Երգչուհու խոսքով, թեև երբեմն իսկապես հոգնեցուցիչ է հարյուրավոր ինքնագրեր տալն ու լուսանկարվելը, միևնույն է, նա միշտ փորձում է սիրալիր լինել իր երկրպագուների հետ և չհիասթափեցնել նրանց, որովհետև, գուցե իր հետ հանդիպումը երկրպագուի հետ միակ հնարավորությունը լինի:

«Ես պարզապես փորձում եմ մտքումս արթուն պահել այն գիտակցումը, որ ես պատասխանատվություն ունեմ, և գուցե այդ մարդն այլևս ինձ հանդիպելու հնարավորություն չունենա»,- հայտնել է երգչուհին:

Զրույցին ներկա հանրահայտ դերասանուհի Շարլիզ Թերոնի այն հարցին, թե ինչպես կարելի է «լավ ու օրինակելի հանրային մարդ լինել», Լոպեսը պատասխանել է, որ փորձում է հավատարիմ մնալ իր «եսին» և լինել որքան հնարավոր է անկեղծ:

«Ըստ իս՝ ես օրինակելի աստղ եմ, քանզի մշտապես փորձում եմ ճիշտ քայլեր անել և միևնույն ժամանակ հավատարիմ մնալ իմ եսին»,- ասել է նա:

Լոպեսը, որն այս տարի կոլումբացի երգչուհի Շակիրայի հետ հանդես կգա ամերիկյան սուպերգավաթի ամենամասշտաբային շոուին, հարցազրույցի ընթացքում նաև խոստովանել է, որ փոքր-ինչ «լարված» է ելույթի կապակցությամբ:

«Սակայն ելույթից առաջ, այն պահին, երբ պատրաստվում եմ բեմ բարձրանալ, նայում եմ հանդիսատեսին և ներսումս ամեն ինչ հանդարտվում է»,- ասել է Լոպեսը: