«Այս աշխարհում, որտեղ բոլորը միմյանց նման են, նա այնքան բնական ու գեղեցիկ է». թուրք երգչուհին՝ Gucci-ի ցուցադրությանը մասնակցած հայ մոդելի մասին

Թուրքիայում հայտնի երգչուհի Հյուլյա Ավշարը հայտարարել է, որ իրեն դուր է գալիս վերջերս Gucci նորաձևության տան ցուցադրությանը մասնակցած մոդել Արմինե Հարությունյանը: Այս մասին տեղեկացնում է En Son Haber լրատվականը:

Լրագրողներին տված հարցազրույցում Հյուլյա Ավշարը, մասնավորապես, ասել է. «Վերջին շրջանի իմ ամենահավանած և, իմ կարծիքով, ամենախարիզմատիկ դեմքն Արմինե Հարությունյանն է: Այս աշխարհում, որտեղ բոլորը միմյանց նման են, նա այնքան բնական ու գեղեցիկ է, որ գրավում է ուշադրությունս»:

Հիշեցնենք, որ 23-ամյա Արմինե Հարությունյանը համաշխարհային նորաձևության ցուցադրությանը մասնակցած առաջին հայաստանցի մոդելն է: Միլանում նա պոդիում է բարձրացել Gucci-ի գարուն-ամառ հավաքածուն ցուցադրելու համար: