Կոբզոնի այրին խնդրել է սնանկ ճանաչել երգչից 25 միլիոն դոլար պարտքով վերցրած և գումարը տանուլ տված գործարարին

ԽՍՀՄ ժողովրդական արտիստ Իոսիֆ Կոբզոնի այրին՝ Նելլին, պահանջել է սնանկ ճանաչել գործարար Վագիֆ Փեյսախովին, որը հանգուցյալ Կոբզոնին 25 միլիոն դոլարի չափով գումար է պարտք, գրում է РИА Новости-ն՝ հղում անելով Մոսկվայի Արբիտրաժային դատարանի տեղեկատվությանը:

Հայցը դատարան է ներկայացվել հոկտեմբերի 30-ին:

2016 թվականին Փեյսախովին դատապարտել են 6 տարվա ազատազրկման` առավելապես խոշոր չափի խարդախության մեղադրանքով: Ըստ քննության տվյալների՝ գործարարը բազմիցս Կոբզոնից պարտքով գումար է վերցրել՝ սեփական բիզնեսը զարգացնելու համար, և չի վերադարձրել: 2014 թվականի փետրվարին երգիչը պահանջել է պարտքի վերաբերյալ 2 պայմանագիր կնքել: Երկու պայմանագրերով սահմանված պարտքի գումարը կազմել է 25 միլիոն դոլար:

Պայմանագրի կնքումից մեկ ամիս անց գործարարը հայտարարել է, որ պայմանագրով սահմանված պարտավորությունները չի կարող կատարել, քանի որ ողջ գումարը տանուլ է տվել պոկեր խաղում: Այդ ժամանակ Կոբզոնը ոստիկանություն է դիմել, որն էլ քրեական գործ է հարուցել: Ինչպես պարզել են քննիչները, գործարարն ի սկզբանե չի պատրաստվել վերադարձնել երգչի գումարը և խաբել է նրան:

Օդինցովյան քաղաքային դատարանը Փեյսախովին մեղավոր է ճանաչել՝ բավարարելով Կոբզոնի հայցը:

Կոբզոնը մահացել է 2018 թվականի օգոստոսի 30-ին՝ երկարատև հիվանդությունից հետո: