Խոակին Ֆենիքսը խոստովանել է, որ Ջոքերի մասին պատմող նոր ֆիլմի համար գրեթե 24 կիլոգրամի կորուստը ազդել է իր հոգեկան առողջության վրա

Հոլիվուդյան դերասան Խոակին Ֆենիքսը խոստովանել է, որ Ջոքերի մասին պատմող նոր ֆիլմում գլխավոր դերում հանդես գալու համար գրեթե 24 կիլոգրամ է կորցրել, ինչն ազդել է իր հոգեկան առողջության վրա, գրում է Insider-ը:

«Ինչպես պարզվեց, այն  ազդում է հոգեբանության վրա, և դա մարդուն կարող է խելագարության հասցնել»,- ասել է դերասանը:

Ֆենիքսը նաև խոստովանել է, որ քաշի կորստի շրջանում հրաժարվել է մասնակցել հասարակական միջոցառումներին և շփվել մարդկանց հետ, ինչպես նաև սկսել է ավելի հաճախ մտածել սննդի մասին:

Դերասանի խոսքով՝ հոգնածությունը, ուշադրության կենտրոնացման դժվարությունները և ֆիզիկական ակտիվության կորուստը, որոնք առկա էին իր մոտ, քաշի կորստի կողմնակի բարդություններն էին:

Աղբյուրի փորձագետը նշում է, որ այս բոլոր ախտանշանները լուրջ, նույնիսկ կյանքի համար վտանգավոր սննդային վարքագծի խանգարման նշաններ են: Նրա խոսքով՝ 24 կիլոգրամի կորուստը պետք է մի քանի ամիսների փոխարեն տևեր առնվազն մեկ տարի:

Հիշեցնենք, որ Ջոկերի մասին պատմող նոր ֆիլմը Վենետիկի ամենամյա կինոփառատոնում արժանացել էր «Ոսկե առյուծ» գլխավոր մրցանակին:

Արարողության ընթացքում ֆիլմի ռեժիսոր Թոդ Ֆիլիպսը շնորհակալություն էր հայտնել Ֆենիքսին՝ ֆիլմին բերած հաջողության համար, որն իր հետ բեմ էր բարձրացել՝ «Ոսկե առյուծը» ստանալու։

«Բոլորին է հայտնի, որ ֆիլմը համատեղ ջանքերի արտադրանք է, և ես ցանկանում եմ շնորհակալություն հայտնել ամբողջ նկարահանող խմբին և դերասաններին։ Բայց այս ֆիլմը չէր լինի առանց Խոակին Ֆենիքսի» ,- հայտնել էր Ֆիլիպսը։