Հինգ բան, որ հաճախ ենք անտեսում ամուսնական կյանքում

1. Դուք չափազանց շատ եք կախված ձեր զուգընկերոջից

Աշխարհում ոչ մի մարդ ի զորու չէ բավարարել իր բոլոր պահանջմունքները: Չպետք է սպասել, որ ձեր զուգընկերը միաժամանակ ձեզ համար լավագույն ընկեր, սիրեկան, հոգեբան, անձնական հաշվապահ կամ այլ անհրաժեշտ մեկը կդառնա: Հոգեբան Քրիսթին Ցեյզինգը զույգերին խորհուրդ է տալիս հրաժարվել այդպիսի կախվածությունից, որոշակի տարածություն թողնել եւ ուրիշների հետ փոխհարաբերություններ ստեղծել:

«Զույգերը, որոնք միշտ ու ամեն ինչ միասին են անում, պետք է կենտրոնանան ուրիշների հետ հարաբերություններ ստեղծելու վրա: Ավելի շատ ժամանակ անցկացնեն ընկերների հետ, սեփական հոբբին ու հետաքրքրությունները գտնեն: Ավելի ամբողջական, լեցուն մարդիկ ավելի լիարժեք հարաբերություններ են ստեղծում»:

2. Դուք ըստ արժանվույն չեք գնահատում ձեր զուգընկերոջ կատարած տնային գործերը

Շատերը փորձում են հավասարակշռել կարիերան եւ ընտանեկան կյանքը, բայց քչերն են խոստովանում, թե որքան մեծ ուժ է խլում տնային աշխատանքը: Երկար ժամանակ կանայք միայնակ են հոգացել այդ գործերը, քանի որ համարվել է, որ դա տղամարդուն վայել չէ: Ցավոք, ներկայում էլ տան աշխատանքի մեծ մասը կանայք են կատարում, ովքեր ստիպված են նաեւ կարիերայով զբաղվել: Բարեբախտաբար, տղամարդիկ ավելի ակտիվ են դառնում այս առումով եւ տնային գործերի մի մասն իրենց վրա են վերցնում: Գաղտնիքը ձեր զուգընկերոջ կողմից արված աշխատանքը գնահատելու մեջ է, քանի որ ընթրիքն ինքն իրեն չի պատրաստվի:

3. Դուք թերագնահատում եք անձնական տարածության անհրաժեշտությունը

Ձեր հարաբերությունների սկզբին դուք ձգտում էիք միասին անցկացնել ամեն մի ազատ րոպեն: Այդ ժամանակ նման մտերմությունն արբեցնող էր թվում, բայց ժամանակի ընթացքում ձեազնից առնվազն մեկի համար այն կարող է խեղդող լինել: Ոչ մի վատ բան չկա, որ զուգընկերները անձնական ժամանակ ունենան: Մարդիկ հաճախ խրվում են հարաբերությունների մեջ ու մոռանում սեփական անկախության մասին: Սիրահարվածությունը առիթ չէ սեփական հոբբիից, ամենօրյա գործերից հրաժարվելու համար, քանի որ դա կարեւոր է հարաբերությունները պահպանելու համար: Զույգը պետք է փոխադարձ կախվածության համար հավասարակշռություն գտնի. «Բարգավաճել եւ միասին, եւ առանձին», այդպես է դա անվանում հոգեթերապեւտ Լիզ Հիգենսը:

4. Դուք ձեզ բավականաչափ չեք սիրում

Հին, ծեծված ճշմարտություն է: Դուք չեք կարող իսկական սիրով սիրել ինչ-որ մեկին, եթե ինքներդ ձեզ չեք սիրում: Ցածր ինքնագնահատականով հարաբերություններ սկսելը կվնասի այդ հարաբերությունները, քանի որ ինքդ քո նկատմամբ բացասական վերաբերմունքը գործնականում բացասաբար է ազդում ձեր ամուսնության տարբեր ասպեկտների վրա: Ինքն իրեն մերժող մարդը չի կարող առողջ հարաբերություններ ունենալ: Ամուր հարաբերությունները սկսվում են նրանից, որ դուք գնահատում եք ինքներդ ձեզ եւ դրական եք վերաբերվում ձեզ:

5. Դուք վեճերի ժամանակ բռնկվում եք եւ հազվադեպ եք ներողություն խնդրում:

Երբ դուք ինչ-որ տհաճ բան եք ասում ձեր զուգընկերոջը, ավելի լավ է վիրավորական բառերի համար որքան հնարավոր է շուտ ներողություն խնդրել: Ցասման մեջ շատերն են միմյանց գոտկատեղից ներքեւ հարված հասցնում:

Ցավոք, այդ բռնկումների համար նրանք հազվադեպ են ներողություն խնդրում, եւ վիրավորանքը կուտակվում է: Բոլորն էլ ունեն «մութ կողմ». դա ընդունելով՝ դուք կարող եք այն ավելի հեշտորեն կառավարել ու ավելի կառուցողական դրսեւորել ձեզ վեճերի ժամանակ:

 NEWS.am STYLE