10 պատճառ, որի համար արժե թողնել ամեն ինչ ու շտապել Հայաստան. ռուսական կայքի անդրադարձը (լուսանկարներ)

Ռուսական ժամանցային adme.ru կայքը Երևանի 2800-ամյակի առիթով հատուկ անդրադաձ է կատարել մեր մայրաքաղաքին և ոչ միայն:

«Նրանք, ովքեր գոնե մեկ անգամ եղել են Հայաստանում, անպայման վերադառնում են այստեղ՝ հոգևոր հանգստության, համեղ ուտեստների ու մաքուր օդի համար», - գրում է կայքը՝ նշելով, որ այստեղ այցելելու համար հերթական տոնին սպասել պետք չէ:

Առաջին անգամ մեր երկիր ճանապարհորդել պատրաստվող զբոսաշրջիկներին կայքը խորհուրդ է տվել մոռանալ դիետաների մասին, օգտվել հայերի անսահման հյուրընկալությունից, շրջել հնարավոր բոլոր հին վանքերով ու անպայման տրեխներ գնել ամենահին կաշվե կոշիկի երկրից:

Կայքն առանձնացրել է 10 պատճառ, որի համար արժե «թողնել ամեն ինչ ու շտապել Հայաստան»:

Առաջինը, որ նկատում է Երևան ժամանող զբոսաշրջիկը, այն է, որ մեր քաղաքում բավականին շատ են բացօթյա սրճարանները, ինչի շնորհիվ էլ շատ զբոսաշրջիկներ Երևանն անվանում են «Արևելքի Փարիզ»: Կայքը խորհուրդ է տալիս Երևան այցելողներին զբոսնել քաղաքի փողոցներով՝ հատկապես երեկոյան ժամերին, երբ ամառային օրերին շոգը նահանջում է: Սա նաև հրաշալի առիթ կարող է լինել ծանոթանալու տեղացիների հետ, որոնք այդքան սիրում են երեկոյան զբոսանքները: Իսկ ամենակարևորը՝ մեր քաղաքում երեկոյան նույնպես շատ ապահով է:

 Հայաստանը՝ որպես քրիստոնեություն ընդունած առաջին երկիր, իրավամբ վաստակել է նաև աշխարհի ամենահին վանքերի երկիր կոչվելու իրավունքը: Զբոսաշրջիկներին խորհուրդ է տրվել անպայման այցելել Հայաստանի հոգևոր կենտրոն՝ Էջմիածին, ինչպես նաև բաց չթողնել հրաշագեղ Նորավանքով զմայլվելու առիթը՝ երաշխավորելով աննկարագրելի զգացողություններ: 

Հայաստանի «թերություններից» մեկը շատերը համարում են ծովի բացակայությունը, մինչդեռ առավել տեղեկացված զբոսաշրջիկները գիտեն, որ Սևանա լիճը հրաշալի այլընտրանք է ամռան տապից հովանալու համար: 

Կայքը խորհուրդ է տալիս բաց չթողնել սևանյան հանգիստը հատկապես ձկան և ծովախեցգետինների սիրահարներին:

Հայերը, ինչ խոսք, ստեղծագործ ժողովուրդ են, և այդ մասին գիտեն նաև adme.ru-ի լրագրողները: Հոդվածի հեղինակները գնահատել են ոչ միայն Կասկադում բազմաթիվ ժամանակակից արտ-օբյեկտները, այլև մի շարք պատկերասրահներն ու թանգարանները, որոնք մեր քաղաքում անպակաս են:

Ինչ նպատակով էլ որ զբոսաշրջիկը գա Հայաստան՝ ամեն այց պարտադիր վերածվում է գաստրոնոմիկ ճանապարհորդության, քանի որ խորովածի, քաբաբների, տարատեսակ սթեյքերի, շաուրմաների, տոլմաների ու հացի տեսականիներից այստեղ հրաժարվելն անհնարին է:

«Այստեղ դուք կհասկանաք, թե ինչ ասել է իսկապես լավ պատրաստված միսն ու ինչ համ ունի միրգ-բանջարեղենը»,- գրում է adme.ru-ն:

«Հայերի երակներում հոսում է ոչ թե կոնյակ ու գինի, այլ սուրճ»,- կատակով նկատում են հոդվածի հեղինակները՝ խորհուրդ տալով Հայաստանում անպայման վայելել տեղական արևելյան սուրճը: Կայքը նկատում է, որ հայերը սուրճ իսկապես շատ են խմում, նաև խորհուրդ է տալիս զվարճանքի համար չմոռանալ շրջել բաժակն ու փորձել գուշակություն կորզել որևէ տանտիրուհուց:

Դե, իհարկե, ինչպես չհիշել մեր երկրում գտնված ու շուրջ 5500 տարվա կաշվե ոտնամանի մասին: Նշվում է, որ այն լրջորեն ոգեշնչել է հայտնի դիզայներ Մանոլո Բլանիկին, դե իսկ Հայաստան այցելողները կարող են նմանատիպ տեսքով կոշիկներ ձեռք բերել յուրաքանչյուր խանութից՝ նվիրելով այն ընկերներին կամ պահելով որպես գեղեցիկ հուշ: 

Նորավանքի ճանապարհին կան գյուղեր, որտեղ բույն է դրել արագիլների 40 զույգ: Այս անկրկնելի տեսարանը վայելելու համար արժե մի քանի րոպե կանգ առնել այստեղ: Զբոսաշրջիկները, սակայն, պետք է հիշեն, որ ձմեռն արագիլները չվում են տաք վայրեր և վերադառնում միայն գարնանը:

 Հայաստանը նաև հրաշալի վայր է նրանց համար, ովքեր պարզապես ցանկանում են հանգստանալ մեծ քաղաքների աղմուկից ու նետվել բնության գիրկը: adme.ru-ն նույնպես կարծում է, որ մեր երկիրը հրաշալի վայր է հանգստություն գտնելու ու նոր ուժերով լիցքավորվելու համար: Մանավանդ, որ լեռները, լճերն ու անտառները հրաշալի ունկնդիր են, իսկ հնագույն հայկական ճարտարապետությունը պատմելու իսկապես շատ բան ունի:

Թեև հայ ժողովրդին բաժին է հասել հարուստ, բայց ծանր պատմություն՝ հայերը երբեք չեն դադարել մնալ հյուրասեր, օգնող և բարյացակամ: Հենց սա է ամենից շատ զարմացնում ու շոյում մեր երկիր ժամանող զբոսաշրջիկներին, և պատահական չէ, որ այս կայքի՝ Հայաստանին նվիրված հրապարակումը նույնպես միանշանակ պնդում է. «Հայաստանի գլխավոր գանձը տեղի մարդիկ են»: Հեղինակները խորհուրդ են տալիս ցանկության դեպքում կանգ առնել ոչ թե հյուրանոցներում, այլ վարձակալվող տներում, որտեղ տանտերերը ոչ միայն սիրով կյուրընկալեն բոլոր օտարներին, այլև կպատմեն բազմաթիվ հետաքրքիր պատմություններ ու համեղ կկերակրեն: