Կեսարյան հատումը կարող է բացասաբար անդրադառնալ երեխայի ուղեղի ապագա զարգացման վրա

Կեսարյան հատումը կարող է բացասաբար անդրադառնալ երեխայի ուղեղի ապագա զարգացման վրա: Ատլանտայի Ջորջիա համալսարանի գիտնականներն այսպիսի եզրահանգում են կատարել հետազոտության ընթացքում:

Գիտնականների եզրակացությամբ՝ ծննդաբերության ժամանակ օպերատիվ միջամտությունը կարող է բացասաբար ազդել երեխայի ուղեղի ձեւավորման եւ աճի վրա: Դրանից բացի, կեսարյան հատումը կարող է առաջացնել նորածնի իմունիտետի ձեւավորման պրոցեսի խանգարումներ:

Գիտնականները ուշադրություն են դարձրել, որ երեխայի լույս աշխարհ գալուց անմիջապես հետո նրա օրգանիզմում սկսվում է նեյրոնների բնական ոչնչացում եւ առաջանում է հիպոթալամուսի չափից ավելի ակտիվացում: Այս պրոցեսներն անհրաժեշտ են նորածնի իմունային համակարգի կազմավորման եւ նյարդային բջիջների առաջնային շղթաների ձեւավորման համար:

Սակայն մկների վրա կատարված փորձերը ցույց են տվել, որ կեսարյան հատման դեպքում ուղեղի որոշ հատվածներում նեյրոնների մահը նորմայի համեմատությամբ ավելի երկար է տեւում, իսկ իմունիտետը երկար ժամանակ վիրուսների դեմ հակամարմիններ չի արտադրում:

Ավելի վաղ գիտնականները ուշադրություն էին դարձրել, որ կեսարյան հատմամբ ծնված երեխաների մոտ դիտվում է աղիների մանրէային բաղադրության բազմազանության նվազում: