Ինչո՞ւ Հայաստանի մարզային դպրոցներում գրեթե աղջիկ չկա

Հայաստանի մարզերի շատ դպրոցներում աղջիկները շատ քիչ են՝ ամբողջ դասարանում ընդամենը 1-2 աղջիկ: Օրինակ՝ Գեղարքունիքի մարզում դասարաններ կան, որտեղ ընդհանրապես աղջիկներ չկան, միայն տղաներ են:

ՄԱԿ-ի Բնակչության հիմնադրամի գործադիր ներկայացուցիչ Գարիկ Հայրապետյանը նշեց, որ այս անմխիթար վիճակագրությունը հայ հանրության շրջանում 2 բացասական երեւույթի հետեւանք է. նախ՝ սելեկտիվ աբորտների պատճառով երկրում ավելի քիչ է աղջիկ ծնվում, քան տղա, որի հետեւանքով 7-15 տարեկան երեխաների շրջանում տղաներն ավելի շատ են, երկրորդ՝ որոշ ծնողներ իրենց աղջիկներին թույլ չեն տալիս դպրոց հաճախել՝ չցանկանալով, որ նրանք դասարանում միակ աղջիկը լինեն:

Մասնագետը նշեց, որ նման մոտեցումը խախտում է կրթություն ստանալու երեխայի իրավունքը, ինչն, իհարկե, կանդրադառնա այդ երեխայի հետագա ամբողջ կյանքի վրա:

Գարիկ Հայրապետյանի խոսքով՝ այս երեւույթը Հայաստանում սեռերի միջեւ անհավասարության եւս մեկ ապացույց է: Հայաստանում սելեկտիվ աբորտներ են կատարում (չնայած վերջին 3 տարիներին դրանց թիվը կրճատվել է), որովհետեւ ցանկանում են ոչ թե աղջիներ, այլ տղաներ ունենալ: Ծնողներից շատերը կարծում են, որ աղջիկները չեն կարող իրենց աջակցել եւ ապագայում ապահովել, եւ որ միայն տղան կկարողանա ֆինանսական հաջողության եւ բարեկեցության հասնել: Այս կարծիքն ամրապնդվում է նաեւ այն փաստով, որ Հայաստանում կանանց միջին աշխատավարձը 36 տոկոսով ցածր է, քան տղամարդկանց աշխատավարձը: Դրա հետ մեկտեղ, որպես կանոն, կանայք ավելի հաճախ են բարձրագույն կրթություն ստանում եւ ընդհանուր առմամբ ավելի լավ են սովորում, քան տղամարդիկ: Ըստ վիճակագրության՝ Հայաստանում կանանց 57 տոկոսը բարձրագույն կրթություն ունի: Համեմատության համար՝ տղամարդկանց միայն 38-39 տոկոսն է համալսարանն ավարտում:

Հիշարժան է նաեւ, որ մարդկանց 72 տոկոսը, որոնք Հայաստանի ծերանոցներում են հայտնվել, առնվազն մեկ որդի ունի, եւ միայն 40 տոկոսը՝ առնվազն մեկ աղջիկ: Այս վիճակագրությունը վկայում է, որ տղայի առկայությունն ամնեւին էլ չի ապահովում ծնողների բարեկեցիկ ծերությունը:

Մասնագետի խոսքով՝ Հայաստանում արդեն շատ բան է արվել սելեկտիվ աբորտների թիվը կրճատելու համար, եւ այդ բոլոր միջոցառումների արդյունքն արդեն նկատելի է: Սակայն Գարիկ Հայրապետյանը նշեց, որ դա դեռեւս չի նշանակում, որ այլեւս անելիք չկա. եթե մենք իսկապես ցանկանում ենք երկրում սելեկտիվ աբորտների խնդիրը լուծել, հարկավոր է սկսել մարդկանց մտածելակերպից՝ հայերը պետք է սկսեն հասկանալ, որ կանայք եւ տղամարդիկ իրավահավասար են: Նրանք գործով էլ պետք է հավասար հնարավորություններ ունենան եւ միեւնույն աշխատանքի դիմաց միանման աշխատավարձ ստանան: Եթե ծնողները հասկանան, որ իրենց երեխան, անկախ սեռից, կարող է իրենց ապագայում ապահովել եւ ինքն էլ վատ ապահովված չի լինի, ապա սելեկտիվ աբորտներ կատարելը մեծ մասամբ այլեւս իմաստ չի ունենա:

Այս թեմայով Մայիսի 3-ին Երևանում ծնվել է 57 երեխա 9 հետաքրքիր փաստ հնգյակների մասին Ապրիլի 27-ին Երևանում ծնվել է 59 երեխա Ապրիլի 14-20-ը Երևանում ծնվել է 385 երեխա Ապրիլի 25-ին Երևանում ծնվել է 72 երեխա