Սպորտը եւ նիհարելը դիաբետն ավելի արդյունավետ են վերահսկում, քան դեղերը. հետազոտություն

Դիետան եւ ֆիզիկական ծանրաբեռնվածությունը 2-րդ տիպի դիաբետն ավելի արդյունավետ են վերահսկում, քան դեղերը: Այսպիսի եզրակացության են հանգել Մեծ Բրիտանիայի Գլազգոյի համալսարանի հետազոտողները:
Քաշի վերահսկման ծրագրերին մասնակցած հիվանդները զգալիորեն ավելի հազվադեպ են 2-րդ տիպի դիաբետի դեմ դեղերի կարիք ունեցել, նրանց արյան մեջ նաեւ ավելի հաճախ է գլյուկոզայի առողջ մակարդակ եղել: Այսպիսին են դիաբետով տառապող 1500 հիվանդների մասնակցությամբ հետազոտության արդյունքները, որոնք առողջ կենսակերպի հատուկ դասընթացներ են անցել: Նրանց ձեռք բերած արդյունքները համեմատել են դեղեր ընդունող հիվանդների ձեռքբերումների հետ: 16-շաբաթական ռեժիմի ավարտից հետո առաջին խմբի կամավորների մոտ դիաբետի դեմ դեղեր ընդունելու պահանջ չի դիտվել: Նրանք նաեւ կիսով չափ հազվադեպ են բախվել իրենց վիճակի վատթարացմանը մինչեւ այն փուլ, երբ անհրաժեշտ է մշտապես ինսուլին ընդունել:

Երեք տարում անգամ ընդամենը 500 գրամով նիհարած հիվանդներն արդեն տպավորիչ արդյունքների են հասել: Սակայն ամենամեծ առաջընթացը նկատվել է նրանց շրջանում, ովքեր կարողացել են առնվազն 5 կգ-ով նիհարել: Հաջորդ 3 տարիներին նրանց արյան մեջ գլյուկոզայի մակարդակը կայուն նվազել է:

Մարզումների ժամանակ, որոնք 4 ամսվա ընթացքում 90-ական րոպեով անցկացվել են յուրաքանչյուր 2 շաբաթը մեկ, հիվանդները ֆիզիկական ծանրաբեռնվածությունների վերաբերյալ հրահանգներ են ստացել ու հետեւել են կանանց համար օրական 1400 եւ տղամարդկանց համար օրական 1900 կալորիա պարունակող դիետայի: Նրանք նաեւ օգնություն են ստացել կոգնիտիվ վարքի թերապիայի մասնագետներից, որոնք նրանց օգնել են նիհարել:

Սա իսկապես առաջին խոշոր հետազոտությունն է, որն ապացուցում է, որ սեփական քաշի կառավարումը կարող է ավելի արդյունավետ լինել դիաբետի դեմ ցանկացած դեղից: