Աջակողմյան մեքենաների արգելումը եւ տաքսիների լիցենզավորման կարգը մի շղթայի տարբեր մասերն են

Աջակողմյան մեքենաների ղեկի փոփոխությունները անվտանգ չեն, քանի որ ժամանակի ընթացքում կարող են խնդիրներ առաջ բերել՝ ընդհուպ դադարել գործելուց։ Այս մասին NEWS.am-ին հայտնեց «Անհատ տաքսու վարորդների անկախ արհեստակցական կազմակերպության» նախագահ Սերգեյ Գյոզալյանը։

Նրա փոխանցմամբ, հանրապետությունում կա մոտավոր 30 հազար աջակողմյան մեքենա, այսինքն՝ ամբողջ մեքենաների 8 տոկոսը. «Աջակողմյան մեքենաների ղեկի փոփոխությունը ենթադրում է ոչ միայն ֆինանսական միջոցների ծախսում, այլ նաեւ ղեկանիվային եւ արգելակման համակարգերի փոփոխություն։ Ավելին, փոփոխումը իրականացվում է ոչ գործարանային պայմաններում, ինչին դեմ են բոլոր գործարանները։ Միջազգային փորձը եւս ցույց է տալիս, որ նման արգելքը ընդհանրապես տեղին չէ։ Ավելին, օրինակ ԱՄՆ-ում աջակողմյան մեքենաները ոչ միայն չեն արգելվում, այլ նաեւ փոստային ծառայողների մեքենաները հենց աջակողմյան են։ Գերմանիայում նշվում է, որ աջակողմյան մեքենաները պետք է ունենան ձախ թեւիկին համապատասխան հայելի եւ լուսային կարգավորում։ Իսկ ԵՏՄ երկրներում արգելվում է 8 տեղից ավելի աջակողմյան մեքենաների ներկրումը»,-ասաց նա:

Գյոզլյանը աջակողմյան մեքենաների շուրջ նախարարի հայտարարությունը «լղոզված» է համարում, քանի որ նա խոսում է արդեն եղած աջակողմյան մեքենաների ղեկի փոխման մասին, սակայն չի խոսում դրանց ներկրման մասին. «Ավելին, աջակողմյան մեքենաների ու տաքսիների լիցենզավորման կարգի փոփոխությունը մի շղթայի տարբեր մասերն են։ Նրանք ցանկանում են շուկայից դուրս մղել անհատ տաքսիներին, թույլ տալով խոշոր խաղացողների զարգացմանը»,-նշեց նա։

«Քանի որ տաքսիների ոլորտում լիցենզավորված վարորդները կազմում են 2/3-ը, ուստի 1/3-ը բաց է, ըստ երեւույթին, yandex-ը կամ մյուսները ցանկանում են նոր մեքենաներ բերել՝ լցնելով շուկան։ Հետեւաբար, առաջիկայում կուժեղանա հսկողությունհը ոչ լիցենզավորցած տաքսու վարորդների նկատմամբ»,-ընդգծեց Գյոզալյանը:

Հիշեցնենք, որ ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը հայտարարել էր, որ քննարկվում է աջակողմյան մեքենաների արգելումը, սակայն ինչ-որ փոփոխություն կլինի, բայց կարող են աջակողմյան մեքենաներին տերերը վստահ լինել, որ իրենք կշարունակեն վարել իրենց մեքենաները։

Ավելի վաղ NEWS.am-ը հայտնել էր, որ հոկտեմբերի 10-ին կառավարության նիստից հետո նախարար Վահան Մարտիրոսյանն այս առնչությամբ ասել էր. «Դա այն խնդիրն է, որ ինչ–որ մի օր պիտի լուծենք։ Եթե ժամանակին չի արգելվել, ապա մի օր պիտի գա, որ կարգավորենք այդ խնդիրը։ Հայաստանը աջակողմյան երթեւեկության երկիր է, չի կարող լինել երկու կողմ։ Մեքենաները շրջանառությունից հանելու խնդիր չկա։ Ժամանակ կտրամադրվի, 20 տարի թե 50 տարի, կոնկրետ բան չկա, բայց քանի որ Հայաստանը հանդիսանում է աջակողմյան երթեւեկության ապահով երկիր, պետք է այդ խնդիրը լուծվի»:

Ավելի ուշ նախարարը նշել էր, որ ինչ-որ փոփոխություն կլինի, բայց աջ ղեկավոր մեքենաների տերերը կարող են վստահ լինել, որ իրենք կշարունակեն վարել իրենց մեքենաները: