Հրապարակվել է Եվրամիության և Հայաստանի միջեւ կնքվելիք համաձայնագրի տեքստը
Եվրահանձնաժողովը հրապարակել է Եվրամիության եւ Հայաստանի Հանրապետության միջեւ նոյեմբերին Բրյուսելում կնքվելիք համաձայնագրի տեքստը: Փաստաթուղթը, որը բաղկացած է 357 էջից, կրում է «Համապարփակ եւ ընդլայնված գործընկերության համաձայնագիր» անվանումը:
ՀՀ արտաքին գործերի նախարարությունն իր կայքում հրապարակել է փաստաթղթի ոչ պաշտոնական թարգմանությունը:
Համաձայնագիրը 386 հոդվածի շրջանակներում անդրադառնում է ԵՄ-ՀՀ գործընկերության կարգավորման բազմաթիվ՝ քաղաքական, քաղաքացիական, իրավական, տնտեսական, էներգետիկ, կրթական, մշակութային եւ այլ ոլորտների: Փաստաթղթի ներածական մասում անդրադարձ կա նաեւ Ղարաբաղի խնդրին: Մասնավորապես նշված է, որ ճանաչվում է ղարաբաղյան հակամարտության խաղաղ եւ տեւական կարգավորմանն ուղղված Հայաստանի հանձնառության կարեւորությունը եւ ԵԱՀԿ Մինսկի խմբի համանախագահների առաջնորդությամբ ընթացող բանակցությունների շրջանակներում հնարավորինս շուտ կարգավորման հասնելու անհրաժեշտությունը: Նաեւ ընդգծվում է, որ անհրաժեշտ է այդ կարգավորմանը հասնել՝ ՄԱԿ-ի Խարտիայում եւ ԵԱՀԿ հելսինկյան եզրափակիչ ակտում ամրագրված նպատակների եւ սկզբունքների հիման վրա՝ մասնավորապես հիմնվելով ուժի սպառնալիքից կամ գործադրումից զերծ մնալու, պետությունների տարածքային ամբողջականության եւ ժողովուրդների հավասար իրավունքների եւ ինքնորոշման սկզբունքների վրա: Շեշտվում է նաեւ կարգավորման գործընթացին աջակցելու Եվրամիության հանձնառությունը:
Տնտեսական երկխոսությանը վերաբերող հատվածում նշվում է, որ ՀՀ-ն պետք է քայլեր ձեռնարկի լավ գործառնող շուկայական տնտեսության զարգացման եւ իր տնտեսական ու ֆինանսական կարգավորումներն ու քաղաքականությունն աստիճանաբար ԵՄ չափանիշներին մոտեցնելու ուղղությամբ: Եվրամիությունն, իր հերթին, կաջակցի Հայաստանին հուսալի մակրոտնտեսական քաղաքականության ապահովման գործում՝ ներառյալ կենտրոնական բանկի անկախության եւ գների կայունության, պետության ֆինանսական հուսալիության, կայուն փոխարժեքի եւ վճարային հաշվեկշիռի հարցերը:
Փաստաթղթի՝ էներգետիկ համագործակցությանը նվիրված հատվածում ընդգծվում է էներգետիկ անվտանգության, էներգիայի աղբյուրների եւ փոխանցման ուղիների բազմազանեցման, ինչպեսեւ էներգիայի մրցունակ շուկա զարգացնելու եւ տարածաշրջանային շուկաներում ինտեգրվելու կարեւորությունը: Էներգետիկ ոլորտում համագործակցությունը ենթադրում է նաեւ Մեծամորի ատոմային էլեկտրակայանի փակումն ու անվտանգ ապագործարկումը եւ ՀՀ էներգետիկ անվտանգությունն ու կայուն զարգացման պայմաններն ապահովելու համար անհրաժեշտ նոր հզորությամբ դրա փոխարինումը:
Համաձայնագրում արծարծվում է նաեւ կողմերի քաղաքացիների շարժունակության խթանման անհրաժեշտությունը` ինչպես ԵՄ և ՀՀ միջև ստորագրված արտահանձնման և մուտքի արտոնագրերի (վիզաների) դյուրացման համաձայնագրերի կիրառման, այնպես էլ համապատասխան ժամանակահատվածում վիզաների ազատականացման շուրջ երկխոսություն սկսելու միջոցով:
22-ամյա հղի կինը մեքենայից դուրս է նետվել և մաhացել, ոստիկանությունը մանրամասներ է հայտնել Գեղարքուն...
Մեղավոր է ճանաչվել Ռուսաստանի օգտին լրտեսության մեջ
9-21 կմ պետք է Ադրբեջանի տարածքով անցնենք, որ հասնենք Արծվաշեն. Սասուն Միքայելյան
Մայիսի 25-28-ը մի շարք փողոցներում նախատեսված են երթևեկության սահմանափակումներ
Այս տարի ունենք ավելի քան 22,000 շրջանավարտ. վաղը կհնչի վերջին զանգը
Երեւանում եւս ժամանակ առ ժամանակ սպասվում է անձրեւ եւ ամպրոպ
Հայաստանը առաջին անգամ հյուրընկալել է «Կոնկուրս Մոնդիալ դե Բրյուսել» գինու համտես-մրցույթը
«Ատոմային նոր էներգաբլոկի կառուցում» ՓԲԸ-ի կանոնադրական կապիտալը կհամալրվի 200 մլն դրամով
ՃՏՊ Երեւանի կենտրոնում` մահվան դեպքով
Ռուսական գազի գինը Հայաստանի համար չի կարող թանկանալ