Բնական միջավայրի աղետալի անհետացում է գրանցվել

Մեծ Բրիտանիայում Սաութհեմփթոնի համալսարանի, Բանգորի համալսարանի եւ Արեւելյան ու աֆրիկյան հետազոտությունների դպրոցի գիտնականները պարզել են, որ խոշոր բնական էկոհամակարգերը, ինչպիսիք են անձրեւային անտառները եւ մարջանի խութերը, ոչնչացվում են շատ ավելի արագ, քան կարծում էին նախկինում: Amazon-ի անտառները կարող են անհետանալ ընդամենը 49 տարում, իսկ Կարիբյան մարջանները` ընդամենը 15 տարում, հայտնում է Lenta-ն՝ հղում անելով Phys.org-ին:

Հետազոտողները ուսումնասիրել են ջրային եւ երկրային 40 միջավայրում գրանցված փոփոխությունների վերաբերյալ տվյալները: Պարզվել է, որ թեեւ խոշոր էկոհամակարգերում աղետալի փլուզումն ավելի երկար է տեւում, ոչնչացման արագությունը շատ ավելի մեծ է, քան փոքր էկոհամակարգերում: Այս արդյունքները բացատրվում են նրանով, որ մեծ միջավայրերը բաղկացած են մեծ թվով ենթահամակարգերից, որոնք ձեւավորվել են տեսակների եւ նրանց բնակավայրերի կողմից:

Այսպիսով, էկոհամակարգերը, որոնք գոյություն են ունեցել հազարավոր տարիներ, կարող են ոչնչացվել 50 տարուց պակաս ժամանակահատվածում: Բնապահպանական պայմանների փոփոխությունների ավերիչ ազդեցությունն արտահայտվում է, օրինակ, անտառային հրդեհներում, որոնք ավելի հաճախ տեղի կունենան կլիմայի գլոբալ փոփոխությունների ֆոնին: