Ամառային արձակուրդը եւ թեժ աշունը Հայաստանում

Տարօրինակ, տարօրինակ քաղաքական գործիչներ են հայ քաղաքական գործիչները, եթե ավելի ճիշտ, հայաստանյան քաղաքական գործիչները:

Քաղաքական իրադարձությունները, աշխարհաքաղաքական իրադարձությունները պտտվում են բացառապես նրանցից յուրաքանչյուրի շուրջ, իհարկե, եզակի բացառություններով:

Եթե չեք հավատում, ապա փաստերը համադրելով դուք եւս կգաք նույն եզրահանգման:

Այսպես, գործող իշխանությունները «նախկինների ցնցող ապօրինությունների» մասին ամառային թեժ հանգստի շրջանում չեն հիշում: Իսկ ինչո՞ւ հիշեն, երբ լսարան չունեն: Իսկ լսարան չունեն, քանի որ հանգստացող հային ոչինչ չի հետաքրքրում, անգամ Բայդենի հրաժարումը մասնակցել նախագահի ընտրությանը:

Գարնանը եւ աշնանը, ըստ ընդդիմադիր շատ ու շատ գործիչների, Հայաստանը գտնվում է օրհասական վիճակում, մեզ սպառնում են պատերազմներ, տարածաշրջանում պատերազմական վիճակը, բայց ամռանն այս ամենը չքանում է եւ նրանք իրենց հանգիստն են վայելում աշխարհի գեղատեսիլ եւ հիասքանչ հանգստավայրերում:

Իսկ երբ մոտենում է աշունը եւ հատկապես սկսվում է աշունը, կրկին ու կրկին պարզվում է, որ նախկինները սարսափազդու հանցանքներ են գործել եւ այնքան շատ, որ քննիչներն ու դատավորները քիթ սրբելու ժամանակ չունեն, միաժամանակ Հայաստանը կրկին հայտնվում է օրհասական վիճակում եւ կրկին փրկիչների կարիք է զգում:

Հետաքրքիր է դեռ որքա՞ն պետք է ձգվի այս տարօրինակ եւ խայտառակ ժամանակաշրջանը: 

Top-News.am