Microsoft-ը նախազգուշացրել է Windows 10-ի տարբերակի աջակցության դադարեցման մասին

Microsoft ընկերությունը սկսել է նախազգուշացումներ ուղարկել Windows 10-ի տարբերակներից մեկի օգտվողներին, որը շուտով կդադարի աջակցություն ստանալ, հայտնում է WindowsLatest-ը:

Խոսքը Windows 10-ի 1909 տարբերակի (November 2019 Update) մասին է, որը 2019-ի վերջին օպերացիոն համակարգի հիմնական թարմացումն է: Օգտվողները, ովքեր դեռ կիրառում են այս թարմացումը, 2021 թվականի մայիսի 11-ից այլեւս չեն ստանա անվտանգության ուղղումներ:

Microsoft-ն առաջարկում է համակարգիչը թարմացնել մինչեւ Windows 10 May 2020 Update կամ October 2020 Update (2H20): Սակայն ոչ բոլոր օգտվողներն են թարմացման տեղադրմանը համաձայնելու դեպքում ավտոմատ կերպով ստանում թարմացումը՝ համակարգը նախազգուշացնում է, որ այն ավելի ուշ հասանելի կդառնա:

2021 թվականին Microsoft-ը կներկայացնի հերթական խոշոր թարմացում այն օպերացիոն համակարգի համար, որը ստացել է Windows 10X անվանումը: Դրանում մշակողները ուշադրություն կդարձնեն ինտերֆեյսի վերափոխմանը եւ ոչ ստանդարտ էկրանների հետ համատեղելիությանը: