Նիկոլ Փաշինյանն ընդդեմ գիտության եւ կրթության. կամ ինչպես կազմաքանդել գիտակրթական համակարգը
Նիկոլ Փաշինյանը շաբաթ՝ մայիսի 16-ին կայացած ասուլիսի ժամանակ մի շատ վտանգավոր եւ մտահոգիչ հայտարարություն արեց, որը այս կամ այն պատճառով չարժանացավ անհրաժեշտ ուշադրության կամ դեռ չի արժանացել այդ ուշադրությանը: Փաշինյանը հայտնեց, թե այսպես կոչված հեռավար, իսկ իրականում համացանցի օգնությամբ իրականացվող առցանց կրթությունը Հայաստանում կարող է շարունակվել նաեւ աշնանը:
«Մենք հեռավար կրթության ամբողջական համակարգ կունենանք մինչեւ աշուն, որովհետեւ մեծ հավանականություն կա, որ աշնանը եւս կորոնավիրուս ենք ունենալու, որպեսզի ուսումնական գործընթացը չխաթարվի»,- ասել է Փաշինյանը:
Իհարկե, բոլոր նրանք, ովքեր քարոզչամեքենայի հուժկու գրոհի հետեւանքով սարսափում են կորոնավիրուսից, կարող է հիանան այս հայտարարությամբ, կարող է ասեն՝ տեսեք ինչ բարի եւ հոգատար վարչապետ ունենք, իսկ իրականում տեղի է ունենում կրթական եւ գիտական համակարգի ավերման գործընթաց, որն իրականացվում կամ փորձ է արվում իրականացնել աշխարհի այլ երկրներում եւս:
Ռուսաստանում մի քանի օր, այսպես ասած, հեռավար կրթություն իրականացնելուց հետո այն անմիջապես դադարեցրին: Հիմա Ռուսաստանում դասերն ընդհատված են: Պատճառն այն է, որ այնտեղ հասկացան, թե ինչ նպատակ է հետապնդում այս համակարգի կիրառումը:
ԱՄՆ նախագահ Դոնալդ Թրամփը հայտարարեց, որ այսուհետ դպրոցները կարող են վերսկսել իրենց գործունեությունը: Դե, իսկ Շվեդիայում դասերը չէին էլ դադարեցվել:
Այս ամենի կողքին տեսնում ենք Փաշինյանին, որը պնդում է, թե աշնանը լինելու է նույն համավարակային իրավիճակը եւ դասերն էլ առցանց են լինելու: Հիմա ճիշտ ժամանակն է, որ դպրոցականների ծնողները, ուսանողները դուրս գան փողոց եւ պահանջեն իրենց նորմալ ուսում ապահովել, հակառակ դեպքում, հետո այս ամենի տակից դուրս գալը դժվար է լինելու:
Գլոբալիստները կամ նրանցից առավել ցինիկները, ինչպես պնդում են բավական լուրջ փորձագետներ, խնդիր են դրել ամբողջ աշխարհում արմատապես փոխել գիտակրթական համակարգը: Տեսեք, թե ինչ է այդ մասին գրում դրա կողմնակիցներից մեկը՝ «Վալդայ» ակումբի ծրագրային տնօրեն Օլեգ Բարաբանովը: «Միաժամանակ, կմնան ընտրյալ տասնյակ հազարավոր երեխաներ, որոնք հնարավորություն կունենան կրթություն ստանալ լիարժեք սոցիալական շփման պայմաններում, այլ կերպ ասած՝ առկա: Նման շփումը եւ ուսուցումը թույլ է տալիս սեփական շահերը համադրել կոլեկտիվի հետ, որն էլ ձեւավորում է անհատ եւ առաջնորդ: Օնլայնը նման հնարավորությունը խիստ սահմանափակում է: Բայց հանրությունում առաջնորդները չպետք է շատ լինեն, հատկապես ռեսուրսների կրճատման պայմաններում»:
Հիմա հասկացա՞ք, թե ինչու է Նիկոլ Փաշինյանը շտապում հանրային տրամադրությունները ստուգելու համար հայտնել, որ սեպտեմբերից ուսուցումը կշարունակվի առցանց: Հիմա հասկացա՞ք, թե ինչու հանկարծ Օբաման որոշեց քննադատել Թրամփին, որը կոչ է արել բացել դպրոցները: Հիմա հասկացա՞ք, թե գլոբալիստների ակումբերն ինչու են քննադատում Շվեդիայի կառավարությանը:
Դպրոց հաճախելը, ուսուցչի հետ շփվելը, իրական դասապրոցեսը ցանկանում են դարձնել բացառապես ընտրյալների համար: Սա է ամբողջ իրականությունը: Հիմա սա է փորձարկվում: Մնում է տեսնել, թե այս կամ հանրությունը ինչպես կարձագանքի այս ամենին: Ամերիկացիները, իտալացիները, կարգապահ գերմանացիները դուրս են եկել փողոց եւ պատասխան են պահանջում իրենց կառավարություններից այս մեծ խառնաշփոթի համար: Սա շատ շուտով լինելու է Հայաստանում:
Իսկ առայժմ մեզ մոտ կրթության ողնաշարը ջարդվում է: Համալսարաններում դասախոսները, նրանց օգնականները վեց կամ յոթ հոգով նստում են նույն սենյակում, իսկ դիպլոմային աշխատանք ներկայացնողը նստում է տանը եւ պաշտպանությունն իրականացնում համացանցի օգնությամբ: Ինչ որ մեկը կասի՞ այս աբսուրդի իմաստը որն է:
Իսկ ամեն ինչ շատ պարզ է: Մարդկանց հոգեբանորեն պատրաստում են այս տխմար համակարգի ամբողջական ներդրմանը: Իսկ այն, ինչ պատրաստվում են անել ընդունելության քննությունների ժամանակ Հայաստանում, սարսափելի է եւ քանի ուշ չէ պետք է օգնել դիմորդներին: Պարզվում է, որ քննությունը լինելու է մեկը, պարզվում է, որ քննությունից առաջ չափելու են դիմորդների տաքությունը եւ եթե հանկարծ այն լինի անգամ 37 ներս չեն թողնելու: Ավելին, դիմորդը երկրորդ հնարավորություն չի ստանալու: Պարզվում է նաեւ, որ դիմորդներին ստիպելու են քննությունը հանձնել դիմակներով: Իսկ թե դա ինչ է ենթադրում երեւանյան շոգի պայմաններում՝ կարելի է կռահել նաեւ հիմա:
Սա մեր դառը իրականությունն է, որը հետո ավելի դառն ու դաժան է լինելու, եթե հանրությունը մնա թմբիրի մեջ եւ չհասկանա, թե իրենց հետ ինչ են անում: Մեկ անգամ եւս շեշտենք՝ Ռուսաստանը հրաժարվել է համացանցի միջոցով իրականացվող դասերից, ԱՄՆ-ում բացում են դպրոցները, Շվեդիայում դրանք երբեք էլ չփակվեցին: Հիմա դուք որոշեք՝ թո՞ւյլ եք տալիս, որ ձեր երեխաներին սորտավորեն եւ զրկեն նորմալ կրթություն ստանալու հնարավորությունից:
Վարդան Մխիթարյան
Top-News.am