Երբ տարիներ շարունակ խոստումները չեն իրականացվում
Շաբաթ օրը՝ փետրվարի 12-ին, կառավարող ՀՀԿ-ն հրապարակեց նրանց անունները, ովքեր կառաջադրվեն ռեյտինգային ընտրակարգով: Պարզ դարձան նաեւ Շիրակի մարզում, այդ թվում մարզկենտրոն Գյումրիում ՀՀԿ-ի հույսերի եւ հավատների անունները:
Ֆելիքս Ցոլակյան, Արման Սահակյան, Մարտուն Գրիգորյան, Սուքիաս Ավետիսյան, Մուշեղ Պետոյան ...: Ահա նրանք ձայներ կհավաքեն ոչ թե իրենց, այլ առաջին հերթին ՀՀԿ-ի եւ նրա առաջնորդի համար:
Թեկնածուների ընտրությունը պատահական չէ: Նրանց մեծ մասը պիտակով ՀՀԿ-ականներ չեն: Սերժ Սարգսյանը քաջ գիտակցում է, որ Գյումրիում այլեւս վստահություն չկա ՀՀԿ-ականների նկատմամբ:
Անվստահության հիմքը Սերժ Սարգսյանի տված ու չիրականացրած խոստումներն են: Ընտրությունից ընտրություն, Սերժ Սարգսյանը եկել է Գյումրի, խնդրել, որ հերթական անգամ ձայն տան հանրապետական կուսակցության թեկնածուի օգտին, օգնեն իրեն վերարտադրվել: Սակայն, գյումրեցին գնացել է ընտրության, բայց չի քվեարկել Սերժ Սարգսյանի եւ ՀՀԿ-ի օգտին, գյումրեցին գնացել եւ դեմ է արտահայտվել իրեն խաբող կուսակցությանը եւ նրա ղեկավարին:
Հսկայական խոստումներ, որոնք այդպես էլ իրականություն չդարձան:
2013 թվական, փետրվարի 18. Հայաստանում նախագահի հերթական ընտրություններն են: Սերժ Սարգսյանը որոշել է երկրորդ անգամ առաջադրվել եւ կրկին հինգ տարի ժամանակով զբաղեցնել ՀՀ նախագահի պաշտոնը: Վերարտադրվելու համար շարունակում է 2008-ի նախընտրական խոստումների նման բարեկեցիկ եւ ապահով երկիր խոստանալ:
Այդ տարիներին, 1988 թվականի Սպիտակի աղետալի երկրաշարժից 26 տարի անց, Գյումրին շարունակում է անօթեւան բնակչներ ունենալ, որոնց հանդեպ պետությունը բնակարանաշինության պարտավորություն ունի: Սերժ Սարգսյանն այդ ժամանակահատվածում հրապարակավ, որպես վերընտրման խոստում, իր վրա է վերցնում գյումրեցի անօթեւանների 2/3-ին բնակարանով ապահովելու խնդրի լուծումը՝ իհարկե պետական բյուջեի հաշվին: Սա նշանակում էր, որ Գյումրու Անի և Մուշ թաղամասերում կառուցվելու է 12 բնակելի շենք՝ 432 բնակարանով:
2013 թվականի նախագահի ընտրությունների ՀՀԿ-ական թեկնածու Սերժ Սարգսյանը, ձայներ խփելու մոլուցքով տարված, խոստանում է, որ ըստ ժամանակացույցի՝ ամենաուշը 2013-ի սեպտեմբերին ավարտելու և բնակիչներին են հանձնելու 432 բնակարան:
432 ընտանիք 2013-ին այդպես էլ բնակարանամուտ չտոնեց: Սերժ Սարգսյանի այս խոստումը հերթական խաբեությունների շարքից էր: Սարգսյանը Գյումրիում չէր կարողացել խփել այնքան ձայն, որքան ցանկացել էր: Գյումրեցին նրան չհավատալու եւ չվստահելու նախկին բազմամյա փորձ ուներ: Թեեւ մինչ այդ հանրապետական այս չինովնիկը Գյումրիում հայտարարել էր. «100-ից 90 տոկոս եմ խփելու կամ 80, 70, 60՝ էդ ա, պակաս չի լինի: Ինչքա՞ն եք ուզում խփեմ»:
Բնակարանները չկառուցվեցին, սակայն Գյումրիում չընտրված Սերժ Սարգսյան նախագահը իրեն իրավունք վերապահեց հայտարարել. «Այժմ, երբ գրեթե ամբողջությամբ ավարտել ենք Գյումրու բնակարանաշինական ծրագրերը, իշխանությունների համար առաջնահերթ են զարգացման նպատակադրումները: Գյումրին պետք է դառնա մեր առավել արագ եւ դինամիկ զարգացող քաղաքային բնակավայրերից մեկը։ Նաեւ սա է լինելու մեր ապահով հայրենիքի հիմնական ցուցիչներից մեկը»։
Գյումրին չզարգացավ ու դինամիկ քաղաք չդարձավ, իսկ սրան զուգահեռ այսօր Գյումրիում 3500 անօթեւան ընտանիք կա: Նրանց բնակարանային խնդրի լուծումը դուրս է մնացել պետական ծրագրի շրջանակներից, որովհետեւ այդպես Սերժ Սարգսյանն է ցանկացել: Այս պահին Գյումրիում 96 տնակային թաղամաս կա՝ 3500 մաշված ու ժանգոտված թիթեղյա տնակով:
2013 թվականին, երբ Սերժ Սարգսյանը կրկին կեղծարարությամբ, վարչական ռեսուրսը սեփական շահերին ծառայեցնելով, ահաբեկելով, կաշառելով վերարտադրվեց, Գյումրիում առկա էր 32,4 տոկոս աղքատություն՝ Ազգային վիճակագրական ծառայության տվյալներով:
Այդ տարում է, որ կտրուկ բարձրանում եւ առ այսօր չի դադարում արտագաղթի ցուցանիշը: 2013 թվականին Շիրակի մարզում բնակչության թիվը նվազում է 11 տոկոսով կամ 31 հազար մարդով, իսկ մշտական հեռացողների 25 հազարը հենց Գյումրու բնակիչներն են:
Այս առիթով 2-րդ անգամ ՀՀ նախագահի աթոռը զբաղեցրած Սերժ Սարգսյանը «լավատեսական» մի հայտարարությամբ է հանդես գալիս. «Մարդիկ հեռանում են, որովհետեւ այս երկրում գաղջ է տիրում, իսկ դա մարդկանց մեջ տարածում են երկու հեռուստաընկերություն եւ 10-ից ավելի տպագիր ու էլեկտրոնային պարբերական: Այն, որ ասում են՝ հեռանում են անարդարության եւ աղքատության պատճառով, այդպես չէ»:
Սերժ Սարգսյանի 2-րդ անգամ նախագահ «ընտրվելուն» զուգահեռ՝ 2013 թվականին նվազում է Գյումրու ծնելիության մակարդակը: Ազգային վիճակագրական ծառայությունը իր հրապարակման մեջ շեշտում է, որ 113 ծնունդով նվազում է գրանցվել՝ նախորդ տարվա համեմատ:
2013-ի նախագահական ըտրություններից առաջ՝ որակական նոր Գյումրի խոստացող Սերժ Սարգսյանը, արդեն 2014-ի սեպտեմբերին հրաժարվում է իր բոլոր խոստումներից, ծրագրերից եւ դրանք կյանքի կոչելու ժամանակացույցից. «Ես երբեք չեմ ասել, որ բոլոր խնդիրները լուծելու եմ հինգ կամ տաս տարում: Դրանց համար ժամանակ է հարկավոր», - Գյումրիում հայտարարում է Սերժ Սարգսյանը:
Թերեւս այս եւ այլ տրված ու չկատարված խոստումներն են պատճառը, որ Սերժ Սարգսյանը Շիրակի մարզում եւ Գյումրիում որոշել է 2017-ի ԱԺ ընտրությունների ժամանակ նախապատվությունը տալ այն թեկնածուներին, ովքեր թեեւ չեն վայելում գյումրեցիների վստահությունը, բայց միաժամանակ կապ չունեն իր նախկին խոստումների հետ: Միանգամից ասենք, գյումրեցին կամ գյումրեցիների մեծամասնությունը չեն պատրաստվում քվեարկելՀՀԿ-ին, անկախ նրանից, թե ովքեր առաջադրված կլինեն ՀՀԿ-ի ռեյտինգային ցուցակով:
Շարունակելի
Դավիթ Գասպարյան