Շերոն Սթոունը պատմել է՝ ինչպես մնացել առանց զգեստի ու «Օսկարի»

Շերոն Սթոունը դարձել է հայտնի մոդել Նաոսմի Քեմփբելի YouTube-յան շոուի հյուրն ու պատմել հետաքրքիր դեպքի մասին, որը նրա հետ տեղի է ունեցել «Օսկար 1996» մրցանակաբաշխության հանձնման արարողության նախօրեին։

Պարզվել է՝ նա գալա երեկոյին գնալու համար ոչինչ չի ունեցել, քանի որ նրա երեկոյան զգեստի վրայով բեռանատար է անցել։ Սթոունն առաջին անգամ «Օսկար»-ի հավակնորդների շարքում հայտնվել է Մարտին Սկորսեզեի «Խաղատուն» ֆիլմում խաղացած դերի համար՝ «Լավագույն դերասանուհի» անվանակարգում։

Դիզայներ Վերա Վոնգը նրա համար դիզայներական զգեստ է կարել, որում Շերոնը կհայտնվեր կարմիր գորգին, եթե արարողությունից մեկ օր առաջ առաքման ծառայության աշխատակիցը չփչացներ նրա զգեստը։ Տուփը, որի մեջ եղել է նրա զգեստը, ընկել է բեռնատարից, ավտոմեքենայի անիվներն անցել են զգեստի վրայով՝ սեւ հետք թողնելով։

Սթոունը չի կարողացել հավատալ տեղի ունեցածին. «Օսկար»-ին առաջադրվելը նրա համար մեծ քայլ էր առաջ։ Նրան օգնության է հասել «Հիմնական բնազդ» ֆիլմի կոստյումների նկարիչ Էլեն Միրոժնիկը։ «Էլենը սկսել է դիտել իմ իրերը, եւ նրա ընտրությունը կանգ է առել Gap-ի բլուզի, Valentino-ի շրջազգեստի եւ Armani-ի զգեստի վրա։ Իսկ ես այդ ամենը լրացրել եմ այգուց գարդենիայի ծաղիկով»,- պատմել է դերասանուհին։

Շերոնը խոստովանել է, որ արարողությունից առաջ զգեստի հետ կապված պատմությունը վատ նշան էր։ «Ես հասկացա, որ հաղթանակ չեմ տանի»,- ասել է նա։ Այդպես էլ եղել է. 1996թ.-ին «Լավագույն դերասանուհի» անվանակարգում «Օսկար» է ստացել Սյուզան Սարանդոնը, որը նկարահանվել է «Մեռյալը քայլում է» (Dead Man Walking) ֆիլմում։