«Դժվար է հիշել այդ ամբողջ ցավը, արցունքները...». բլոգեր Սոֆյա Բրոյանի պատմությունը, թե ինչպես մեկ տարում նիհարեց մոտ 100 կգ (լուսանկարներ)

Տյումենի 23-ամյա բնակչուհի Սոֆյա Բրոյանը համացանցում հայտնի է դարձել իր գեր լինելու մասին հումորային հոլովակների շնորհիվ, սակայն աղջիկը որոշել է կտրուկ փոփոխությունների դիմել և կամքի ուժի շնորհիվ կարողացել է ավելորդ կիլոգրամներից ազատվել, գրում է bigpicture.ru կայքը:

Բլոգերի խոսքով` նա առողջական խնդիրների պատճառով է ստիպված եղել ազատվել ավելորդ քաշից. Բրոյանը ողնաշարի հետ կապված խնդրի հետևանքով դժվարությամբ է տեղաշարժվել, սակայն մի օր նրա վիճակն այնքան է սրվել, որ այլևս չի կարողացել վեր կենալ անկողնուց:

Սա շրջադարձային պահ է եղել Սոֆյայի համար, որից հետո որոշել է հատուկ սննդակարգի հետևել և սպորտով զբաղվել. արդյունքում մեկ տարվա ընթացքում կորցրել է 95 կիլոգրամ:

Աղջիկն այժմ Instagram սոցիալական կայքում բլոգ է վարում, որտեղ պատմում է ավելորդ քաշից ազատվելու իր փորձի մասին և մոտիվացնում է նույն խնդիրն ունեցող աղջիկներին:

Բլոգերը նշում է, որ ստիպված է եղել մեծ դժվարությունների միջով անցնել վերջնական նպատակին հասնելու համար: Նրան մեծ օգնություն են ցուցաբերել երկու ընկերուհիները, որոնք խորհուրդներ են տվել ճիշտ սննդակարգի ընտրության հարցում:

«Դժվար է հիշել այդ ամբողջ ցավը, արցունքները… Մարդիկ, որոնք ավելորդ քաշի հետ կապված խնդիր չեն ունեցել, չեն հասկանա` ինչի մասին է խոսքը…առանց չափազանցնելու, ես դժոխքի միջով եմ անցել»,- գրել է Սոֆյան անձնական բլոգում:

Բրոյանի համար դժվար է եղել նաև արագ սննդից և գազավորված ըմպելիքներից հրաժարվելը, սակայն լավ ինքնազգացողությունն ամրապնդել է կամքի ուժը: