Հայաստանը՝ եվրոպական ֆուտբոլային քարտեզում. 7 ուշագրավ կետ ՈՒԵՖԱ-ի նոր զեկույցից

ՈՒԵՖԱ-ն ներկայացրել է նոր ամենամյա զեկույցը 2018թ. ֆինանսական տարվա ամփոփումով: Ներկայացնում ենք հայկական ֆուտբոլին վերաբերող ամենահետաքրքիր կետերը:

1. Բարձրագույն դիվիզիոնի մասնակիցների քանակը

ՈՒԵՖԱ-ի նույն զեկույցների նախորդ տարիների տարբերակներում մեզ համար ամենադառը կետերից էր բարձրագույն դիվիզիոնի մասնակից թիմերի քանակը: Այն ժամանակ մենք մշտապես վերջին հորիզոնականում էինք, հիմնականում՝ միայնակ, քանի որ ունեինք ընդամենը 6 թիմ Բարձրագույն խմբում: Այժմ մենք արդեն այն մի խումբ երկրների ցանկում ենք, որ չեմպիոնին որոշում ենք 10 թիմով, ինչքան էլ որ «Երևանի» նկատմամբ վերապահումները մեծ են: Ավելի քիչ թիմ ունի Լատվիայի առաջնությունը՝ 9 թիմ, իսկ Անդորրան, Ադրբեջանը, Լիտվան ու Մոլդովան առաջնությունում ունեն միայն 8 թիմ:

Ընդ որում՝ Հայաստանը 2 տարի շարունակ աճ է արձանագրում: Ամենատպավորիչը Ջիբրալթարն է, որը երկրում ունեցած միայն մեկ մարզադաշտում կարողանում է տեղավորել 12 թիմ, իսկ Սան Մարինոն էլ առաջնություն է կազմակերպում 15 թիմով: Առաջնությունների մեծ մասը անցկացվում է աշուն-գարուն ձևաչափով, իսկ գարուն-աշուն ձևաչափով անցնում են Իսլանդիայի, Իռլանդիայի, Նորվեգիայի, Շվեդիայի, Ֆինլանդիայի, Էստոնիայի, Լատվիայի, Լիտվայի, Ֆարերների, Բելառուսի, Մոլդովայի, Ղազախստանի ու Վրաստանի առաջնությունները:

2. Առաջնության ձևաչափը

Հայաստանի առաջնության ընթացիկ մրցաշրջանն անցկացվեց նոր ձևաչափով, ինչը բավական մեծ քննարկումների առիթ դարձավ, թեև՝ մեկնարկից միայն 4 ամիս անց: Փաստորեն, նմանատիպ ձևաչափ ունեն եվրոպական ևս 11 ազգային առաջնություններ: Խոսքը՝ 2 փուլով, յուրաքանչյուրում 2 շրջանով ձևաչափի մասին է: 15 երկրում առաջնությունը անցկացվում է 1 փուլով՝ 2 շրջանով. սա հիմնականում 14 և ավելի մասնակից ունեցող լիգաների մասին է: 12 երկրում էլ առաջնությունը անցկացվում է 1 փուլով՝ 4 շրջանով, ինչպես Բարձրագույն խմբի նախորդ առաջնությունն էր: Կան նաև ավելի խրթին ձևաչափեր:

3. Հայաստանի գավաթ

Թեև Բարձրագույն խմբի մասնակիցների քանակով ունենք դրական փոփոխություն կար, ու դա իր շարունակությունը գտավ նաև VBet Հայաստանի գավաթում, բայց այս առումով դեռ հետնապահների թվում ենք: Գավաթի նախորդ խաղարկությունը ուներ միայն 4 փուլ, նույն վիճակում են նաև Անդորրան, Ադրբեջանը, Ֆարերները և Սան Մարինոն: Այս տարվա VBet Հայաստանի գավաթին ավելացավ ևս մեկ փուլ, թեև «կիսատ», բայց հուսանք հաջորդ խաղարկությանը կմասնակցեն նոր թիմեր ու կունենանք իսկական գավաթային մթնոլորտ: Նախանձելի է Վրաստանի ձեռքբերումը, որը գավաթի խաղարկություն է անցկացնում 7 փուլով: