ՖԻՖԱ-ի եւ ՈՒԵՖԱ-ի ներկայացուցիչներն արձանագրել են խախտումները եւ փաստել, որ Հայաստանում քարե դար է

Երեկ՝ դեկտեմբերի 23-ին, կայացավ ՀՖՖ 19-րդ արտահերթ ժողովը։ Ժողովի օրակարգի հարցերի թվում էր ՀՖՖ նոր նախագահի և գործկոմի նոր կազմի ընտրության հարցը:

Հայաստանի ֆուտբոլի ֆեդերացիայի նախագահի պաշտոնում առաջադրվել էին երկու թեկնածու՝ Արմեն Մելիքբեկյանն ու Թովմաս Գրիգորյանը։ Երրորդ թեկնածուն՝ լեգենդար ֆուտբոլիստ Խորեն Հովհաննիսյանը, շաբաթ օրը հայտարարել էր, որ հանում է իր թեկնածությունը և սատարում Արմեն Մելիքբեկյանին։ Քվեարկության արդյունքում Արմեն Մելիքբեկյանը ստացավ 13 ձայն, Թովմաս Գրիգորյանը՝ 7: Եվս երեք քվեաթերթիկ համարվեց անվավեր:

Այսպիսով, Արմեն Մելիքբեկյանը ընտրվեց Հայաստանի ֆուտբոլի ֆեդերացիայի նախագահի պատշոնում:

Հայտնի մարզական մեկնաբան Սուրեն Բաղդասարյանը «Հրապարակի» հետ զրույցում մեկ բառով նկարագրեց կայացած ընտրությունները՝ խայտառակություն։

«Խայտառակություն էր այն առումով, որ այսքան տարիների ընթացքում առաջին անգամ հնարավորություն կար, որ ֆուտբոլային ընտանիքը ընտրի իր ղեկավարներին, բայց, փաստորեն, ավելի վատ տարբերակով անցան այդ ընտրությունները, քան այն ժամանակ, երբ իշխանությունները միջամտում էին և իրենց թեկնածուին էին առաջադրում, ստիպված բոլորը ընտրում էին այդ թեկնածուին։ Արմեն Մելիքբեկյանը, որը շահագրգիռ կողմ է, ինքն է նախապատրաստել ժողովը։ Բացի սա, ուղղակի զավեշտալի է, որ ամբողջ ժողովի ընտրակարգը մշակել է նրա տեղակալը՝ Արմեն Նիկողոսյանը։ Նրանք կասեցրել են իրենց ոչ ձեռնտու ակումբների անդամակցությունը, այն ակումբների, որոնց չեն կարողացել համոզել, որ քվեարկեն Մելիքբեկյանի օգտին։ Իմ տեղեկություններով՝ այդ 9-ը հասարակական կազմակերպություններից 7-ը պատրաստ են եղել քվեարկելու Թովմաս Գրիգորյանի օգտին։ Քանի որ իրավունքը իրենց ձեռքում է, իրենք երեկ հիմնավորեցին, որ այդ կազմակերպությունները անդամավճար չեն մուծել։ Բայց արդյոք մյուս կազմակերպությունները մուծել են դրանք, թե ոչ, կամ ե՞րբ են մուծել։ Նախ կասեցնելու հարցը պետք է համաժողովում քննարկվի, իսկ այդ կառույցների ներկայացուցիչները պետք է ներկա լինեին ժողովին, բայց Արթուր Ազարյանի թեթև ձեռքով այնպես էր ընտրակարգը մշակվել, որ այդ կազմակերպությունները չլինեին դահլիճում»,- ասաց Բաղդասարյանը։

Բաղդասարյանը պնդում է, որ ՀՖՖ Ֆուտբոլի դեպարտամենտի պետ, ՀՖՖ Գլխավոր քարտուղարի տեղակալ Արթուր Ազարյանը ամեն ինչ արել է, որպեսզի քվեարկությունը բաց ընթանա, ինչը կանոնադրության խախտում է։

«Իրենք ուզում էին, որ քվեարկությունը բաց ընթանա, որպեսզի կարողանային վերահսկողություն սահմանել։ Թովմաս Գրիգորյանն արդեն այս մասին հայտարարությամբ է հանդես եկել։ Պատկերացնու՞մ եք՝ ինչպիսի խայտառակություններ են եղել։ Իսկ ինչ վերաբերվում է ՈՒԵՖԱ-ի կամ ՖԻՖԱ-ի վերահսկողությանը, ասեմ, որ նման համաժողովների ժամանակ պարտադիր կերպով և ՖԻՖԱ-ից, և ՈՒԵՖԱ-ից ներկայացուցիչեր են գալիս։ Այս անգամ երկու ներկայացուցիչ էր եկել և եթե նրանք չլինեին, հավատացեք, որ նախագահի և գործկոմի անդամների ընտրությունը լինելու էր բաց։ Փակ քվեարկությունը հենց նրանց պարտադրանքով է եղել։ Իրենք ի՞նչ կարող են անել։ Եթե տեսնում են, որ խախտումներ կան, նրանք արձանագրում են դրանք և փաստում, որ Հայաստանում քարե դար է»։

Մեկնաբանը նկատում է, որ Արմեն Մելիքբեկյանն ու Արմեն Նիկողոսյանը անգամ ՀՖՖ փոխնախագահի պաշտոններում ընտրվել են ՀՖՖ կանոնադրության խախտումներով։

«Նրանց պետք է ընտրեր ժողովը, սակայն ընտրվել են գործկոմի կողմից, սա ևս խախտում է։ Բացի այս, ՀՖՖ նախագահի պաշտոնում առաջադրվելու համար պետք է վերջին հինգ տարիներից երկուսի ընթացքում թեկնածուն պետք է ֆուտբոլային գործունեություն ծավալած լինի, Արմեն Մելիքբեկյանը երկու տարի գործունեություն չի ծավալել ֆուտբոլի ֆեդերացիայում։ Ֆուտբոլային գործունեություն հասկացության վերաբերյալ ՀՖՖ կանոնադրության մեջ մինչև հիմա էլ հստակություն չկա։ Նախ Արմեն Մելիքբեկյանը ֆուտբոլային մեկնաբան էլ չի եղել, նրան ֆեդերացիայից չգիտեմ ինչու հանել էին և քաղաքական ելույթներ էր ունենում։ Իրոք մեկնաբանը լուրջ հմտություններ ունի, լուրջ աշխատանք է տարել, բայց ոչ ամեն մի մեկնաբան»։

Բաղդասարյանի խոսքով՝ ՀՖՖ կանոնադրության խախտումների մասով ավելի շուտ պետք է ֆուտբոլային հանրությունը բողոքարկի, քան ՀՖՖ նախագահի արդեն նախկին թեկնածու, «Լոռիի» սեփականատեր Թովմաս Գրիգորյանը։

«Արդեն տեղեկություններ կան, որ Հենրիխ Մխիթարյանը ասել է, թե ինքը պատրաստվում է երկար ժամանակով հանդես չգալ հավաքականի կազմում։ Այսինքն, ինքնին, հասկացնում է, որ հավաքականում հանդես չի գա այնքան ժամանակ, քանի դեռ Մելիքբեկյանը ֆեդերացիայի նախագահ է»։

«Ֆուտբոլ +»-ի հիմնադիրը նշում է նաև, որ ՀՖՖ նորընտիր նախագահ Արմեն Մելիքբեկյանը խորամանկությունների է դիմել․ «Երբ Արթուր Վանեցյանը հրաժարական տվեց, Մելիքբեկյանը չէր ասում, որ ինքը իր թեկնածությունը պատրաստվում է դնել, ընդհակառակը՝ նա ասում էր, որ թեկնածությունը չի դնելու։ Սա, իհարկե, խորամանկ քայլ էր։

Հարցին, թե ինչու Խորեն Հովհաննիսյանը վերջին պահին հանեց թեկնածությունը և սկսեց սատարել Մելիքբեկյանին, մեկնաբանը պատասխանեց․ «Խորենի նկատմամբ որևէ մեկը չի կարող ճնշում գործադրել, այնպես, ինչպես իմ նկատմամբ, Խորենը նույնպիսի հեղինակություն է, ինչպիսին ես եմ։ Այդ հեղինակությունը իր ինքնապաշտպանության գլխավոր զենքն է։ Հիմա ես էլ եմ ապշած, ինձ այդ հարցը բոլորը տալիս են։ Ընտրությունների ժամանակ առհասարակ լինում է դեպքեր, որ խոստումներ են տալիս և մարդը մի կողմից մյուս կողմն է անցում, բայց Խորիկի պարագայում ես ուղղակի ապշած էի այն իմաստով, որ հեղինակություն ունեցող մարդը չպետք է հրաժարվի իր սկզբունքից։ Հիմա ես իրենց քննադատում եմ, եթե լինի այնպես, որ Մելիքբեկյանը ինձ պաշտոնի առաջարկ անի, ես ընդունեմ, միանգամից կհեղինակազրկվեմ։ Ես չեմ անդրադառնում նրա անձին, Հայաստանում Խորենին ոչ մեկ այնպես չի ճանաչում, ինչպես ես»։