128,54 կարատ. Լեդի Գագան «Օսկար»-ին է ներկայացել Օդրի Հեփբերնի կրած 30 մլն դոլարանոց բացառիկ ադամանդով (լուսանկարներ)

Հայտնի երգչուհի Լեդի Գագան հեղինակավոր «Օսկար» կինոմրցանակաբաշխության 91-րդ արարողության ամենահայտնի ու աչքի ընկնող հյուրերից էր, գրում է Daily Mail-ը:

«Լավագույն դերասանուհի» անվանակարգում առաջադրված Լեդի Գագան միջոցառմանն է ներկայացել 30 մլն դոլար արժողությամբ, 128,54 կարատանոց բացառիկ դեղին ադամանդով, որը կազմել է նրա ճոխ մանյակի մի մասը:

Հայտնի է, որ 30 մլն դոլարանոց բացառիկ ադամանդը «Նախաճաշ Տիֆանիի մոտ» ֆիլմի համար գովազդային նկարահանումների ընթացքում կրել է հոլիվուդյան գերաստղ Օդրի Հեփբերնը:

Երեսուներկուամյա երգչուհին Tiffany&Co. բրենդի 141 տարվա պատմություն ունեցող ադամանդը համադրել է Alexander McQueen սև անթև զգեստի հետ:

Լեդի Գագան պատմության մեջ երրորդ կինն է, որին բախտ է վիճակվել կրել բացառիկ դեղին ադամանդը: Նրանից ու Հեփբերնից բացի՝ այն կրել է ամերիկացի բարձրաստիճան դիվանագետներից մեկի կինը:

Ադամանդը հայտնաբերվել է 1877թ.՝ Հարավային Աֆրիկայի հանքերից մեկում: Tiffany&Co.-ի հիմնադիր Չարլզ Տիֆանին մեկ տարի անց գնել է 287,47 կարատանոց քարը, որը մշակման արդյունքում դարձել է 128,54 կարատանոց: