Խնդրողների ցանկն ու որակը

Ապրիլին, նոր Սահմանադրությամբ Սերժ Սարգսյանը դառնալու է վարչապետ։ Սա է իրականությունը, սա է քաղաքական փաստի ուժը։ Բայց իշխանությունն ունի խնդիր՝ հանրությանը հրամցնել Ս. Սարգսյանի երրորդ ժամկետի փաստը, հաշվի առնելով նաև նախկինում տված խոստումը։ Սա հեշտ խնդիրներից չէ, բայց ելնում ենք այն պայմանից, որ քաղաքականության մեջ չլուծվող խնդիրներ չկան։

Իշխանությունն ունի ընտրության երկու մոդել՝ խնդրողների ցանկ, սա համարում ենք քանակական մոդել, և երկրորդ՝ քաղաքական ճշգրտորեն մշակված բանաձևերի ճանապարգ՝ սա համարում ենք ՝ որակական մոդել։

Այս պահին արձանագրում ենք, ոչ ջախջախիչ հաղթանակ է տանում քանակը։
Խնդրել առանց IQ-ի։ Այս մոդելը շատ ծիծաղելի է , եթե այդքան տխուր չլիներ՝ թե Ս. Սարգսյանի, թե պետության համար։ Վահրամ Բաղդասարյանի, Շարմազանովի, Գալուստի, Մանվելի, Թեմի առաջնորդի ասածները ունեն կիսագողական-կիսահոգևոր հիմնավորումներ, բայց ոչ պետական։

Կարելի է ենթադրել, որ առաջիկայում նման խնդրողների ցանկը տրամաբանորեն մեծանալու է ՝ իշխանական պատգամավորներին, երկրապահներին և հոգևոր դասին առաջիկայում կմիանան՝ մշակույթի գործիչները, գիտությունների ակադեմիան, ստեղծագործական միությունները, սփյուռքի ներկայացուցիչները, մարզաշխարհը, հետո՝ ընդդիմությունը։ Ի դեպ կա խնդրանքի ծառուկյանական մոդելը՝ ինքնաբուխ գալ տան դռանը խնդրել, կա հյուսիսկորեական մոդելը՝ չորեքթաթ խնդրել (համապատասխան տեսանյութերը համացանցում կան)։ Սա արդեն կախված է Ս. Սարսգյանի այդ պահի հավեսից։

Այս ամենին զուգահեռ կա հետընտրական իրողության վրա, փաստի վրա հիմնված քաղաքական և պետական բանաձևերի մոդելը։ Սա նշանակում է ծրագիր, հիմնավորում, պետական և հանրային նոր օրակարգ, բարեփոխումների ճանապարհային քարտեզ և իհարկե, լրիվ նոր անվանացանկ, թե ովքեր դա կներկայացնեն։ Ընտրությունը դարձյալ Սերժ Սարգսյանինն է։

Խմբագրական

Top-News.am