Դատախազը ինձ և մեր գործընկերներին խոստացավ՝ ներկայացրեք փաստեր, և ես կձերբակալեմ Նիկոլ Փաշինյանին.Արթուր Ղազինյան

Ես հայտարարել եմ, որ պատերազմի հանգամանքները քննող հանձնաժողովի աշխատանքի արդյունքներով նյութերը, բացի զեկույցից, պետք է ուղարկվեն Գլխավոր դատախազին: Այս մասին «Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկման ժամանակ հայտարարեց «Հայաստան» խմբակցության պատգամավոր Արթուր Ղազինյանը.

«Սա տագնապ առաջացրեց իշխանական պատգամավորների մոտ: Ես ասացի, որ փակ զեկույցից բացի՝ նաև բաց զեկույց պետք է ներկայացվի, որտեղ հանգամանալից կերպով ներկայացված կլինեն պատերազմի ընթացքում իշխանության կողմից ընդունված որոշումները, ինչի հետևանքով սկսվեց հանձնաժողովի նախագահի տեղակալի՝ ընտրության, չընտրության կրկեսի վերածված գործընթացը:

Հասկանալի դարձավ, որ մեր օրակարգն ընդունելի չէ իշխանության համար»,-ասաց Ղազինյանը և շեշտեց՝ այս հանցագործությունները պետք է քննվեն իրավական հարթությունում՝ պրոֆեսիոնալ, մասնագետ քննիչների կողմից և պետք է տրվի քրեաիրավական մեղադրանք.

«Հանձնաժողովի աշխատանքի արդյունքը պետք է ուղարկվի գլխավոր դատախազին, որն ինձ և մեր գործընկերներին խոստացավ՝ ներկայացրեք փաստեր, և ես կձերբակալեմ Նիկոլ Փաշինյանին։ Իմ և մեր ընկերների աշխատանքը ԱԺ պաշտանության և անվտանգության հարցերի մշտական հանձնաժողովում ունի մեկ գերակա նպատակ՝ գտնել այդ փաստերն ու ներկայացնել գլխավոր դատախազին։ Մենք անշեղորեն գնալու ենք այդ ճանապարհով»,- ասաց Արթուր Ղազինյանը։