Հայաստանը Ռուսաստանի ճնշմամբ է հրաժարվել Վրաստանում զորավարժություններին մասնակցելուց

Վրաստանում անցկացվող Agile Spirit – 2017 զորավարժություններին մասնակցելուց Հայաստանի հրաժարվելու ենթատեքստում Ռուսաստանի կողմից ճնշում է եղել. դժվար է բացատրել, թե էլ ինչ «սոուսով» է ընդունվել այս անսպասելի որոշումը: Այս մասին սեպտեմբերի 4-ին հայտարարեց պատմական գիտությունների թեկնածու, The National Interest պարբերականի փորձագետ Արեգ Գալստյանը՝ ելույթ ունենալով «Իրադարձություններն եւ փոփոխությունները Մաքսային միությանն անդամակցելու Հայաստանի հայտարարությունից 4 տարի անց» թեմայով քննարկման ընթացքում:

Նրա խոսքով՝ ներկայումս ռուս-ամերիկյան հարաբերություններում ճգնաժամը խորանում է: «Եվ, անկասկած, Վաշինգտոնն ու Մոսկվան բանակցությունների համար խողովակներ չունեն: Իհարկե, այս հարաբերությունների վատթարացումը Հայաստանին մանեւրելու ավելի քիչ հնարավորություններ է տալիս»,- նշեց Գալստյանը: Նա հիշեցրեց, որ Հայաստանը Ռուսաստանի աշխարհաքաղաքական ազդեցության գոտում մնալու որոշում է ընդունել, հետեւաբար՝ Մոսկվան Երեւանի հետ ավելի խիստ կխոսի՝ նրան դնելով որոշակի ընտրության առջեւ: «Ռուսաստանը Վրաստանում զորավարժությունները պաշտոնապես սպառնալիք է անվանել: Վատ է, որ Հայաստանը հրաժարվել է դրանց մասնակցելուց: Հայաստանը սեփական ազգային շահեր ունի: Եթե մասնակցելու սկզբունքային համաձայնություն էին տվել, անհրաժեշտ էր զորավարժություններին մասնակցել»,- ընդգծեց Արեգ Գալստյանը:

Վերջին պահին Հայաստանը հրաժարվել է Վրաստան-ՆԱՏՕ համագործակցության շրջանակում Agile Spirit – 2017 (սեպտեմբերի 3 – 11-ը) բազմազգ զորավարժություններին մասնակցելուց:

 NEWS.am