Վ. Սողոմոնյան. Լիպարիտյանի պատմածն իրականության հետ առնչություն չունի

- Պրն Սողոմոնյան. երեկ (25.01.2017թ.) «Առավոտ» օրաթերթի կայքում հրապարակվել է Ժիրայր Լիպարիտյանի «Փաթեթային, փուլային եւ մոռացված պահեր» վերտառությամբ հոդվածը, որտեղ պրն. Լիպարիտյանը հանրությանն է ներկայացրել մինչ օրս անհայտ մի պատմություն, ըստ որի, 1997թ. Ռոբերտ Քոչարյանը, Սերժ Սարգսյանը, Արկադի Ղուկասյանը, Սամվել Բաբայանը եւ Վազգեն Սարգսյանը կողմ են եղել արցախյան խնդրի փուլային այն տարբերակին, որ առաջարկել է Լեւոն Տեր-Պետրոսյանը (որն այնուհետ, ըստ էության, շարադրել է «Պատերազմ, թե՞ խաղաղություն» հոդվածում, եւ հենց նշված անձանց հետ տարաձայնությունների արդյունքում հրաժարական տվել): Ծանո՞թ եք այդ հրապարակմանը եւ ինչպես կմեկնաբանեք այն:

- Այո, ես ծանոթ եմ հրապարակմանը: Ավելին, ընթերցելուց հետո այն քննարկել եմ եւ Ռոբերտ Քոչարյանի, եւ հիշատակված մյուս անձանցից ոմանց հետ: Ասեմ միանգամից. պրն Լիպարիտյանի պատմածն իրականության հետ որեւէ առնչություն չունի: Բացի հիշատակված անուն-ազգանուններից մնացածը պարզապես սուտ է: Ոչ այդ կազմով Արցախի հարց է քննարկվել, ոչ էլ լողավազանի շուրջ՝ անվտանգության խորհրդի նիստ, թեկուզ եւ ոչ պաշտոնական, ոչ էլ ընդհանրապես՝ փուլային տարբերակի ողջունման հավաք: Յուրաքանչյուր ոք, ով տեղյակ է իրողություններին եւ ճանաչում է Լիպարիտյանի ներկայացրած պատմության գործող անձանց, կհաստատի, որ դրա բովանդակությունը, մասնակիցների ասելիքը, իրար դիմելու ձեւը, բառապաշարը՝ այս ամենն աղերս չունի իրականության հետ:

Այնպես որ, միակ հարցը, որ ծագում է այս հրապարակումից հետո հետեւյալն է. ինչ է սա՝ հիշողության աղճատում, թե՞ պատմական իրողությունները սեփական սխալներին հարմարացնելու փորձ: Ցավոք, երկու տարբերակն էլ ավելի քան հնարավոր են:

Top-News.am

Այս թեմայով Քաղաքականությունը խաղալիք չէ, էսօր էս մարդկանց ձեռքը պետություն է ընկել՝ խաղում են. Վիկտոր Սողոմոնյան (տեսանյութ)