Ռուսաստանի ՊՆ գլխավոր եկեղեցուց ապամոնտաժվել է Պուտինի խճանկարը
Ռուսաստանում Պաշտպանության նախարարության գլխավոր եկեղեցուց ապամոնտաժվել է նախագահ Վլադիմիր Պուտինի խճանկարը: Նախագահին պատկերել էին Մոսկվայի արվարձաններից մեկում կառուցվող տաճարում, որի բացումը նախատեսված է մայիսի 9-ին:
Ռուսական մամուլը օրերս լուսանկարներ էր հրապարակել անավարտ եկեղեցուց, որտեղ երևում էին ոչ միայն Պուտինի, այլև` Պաշտպանության նախարարի, Պետդումայի, Դաշնային խորհրդի առաջնորդների ու այլ բարձրաստիճան պաշտոնյաների խճանկարները, ինչպես նաև հատուկ գրություն `«Ղրիմը մերն է»:
Գեղարվեստական խորհրդի աղբյուրները «Նովայա Գազետա»-ին պատմել էին, որ պատկերազարդման այդ որոշումը կայացվել է ամենաբարձր մակարդակով և համաձայնեցվել Կրեմլի հետ:
Կրեմլի խոսնակ Դմիտրի Պեսկովը հաստատել էր, որ նախագահը տեղյակ է խճանկարից, միաժամանակ պնդել` «Պուտինը կարծում է, թե դեռ վաղ է իրեն նման կերպ մեծարել»: