Օտարերկրյա ներդրումների հոսքն աճել է, իսկ ուղղակի ներդրումների թիվը՝ պակասել. Տիգրան Խաչատրյան
Ինն ամսվա արդյունքներով՝ օտարերկրյա ներդրումների ներհոսքը 268 միլիոն դոլարով ավելին է եղել 2018 թվականի համեմատությամբ, իսկ ուղղակի ներդրումների թիվը պակաս է եղել 60 միլիոն դոլարով: Այս մասին լրագրողների հետ հանդիպմանն ասաց էկոնոմիկայի նախարար Տիգրան Խաչատրյանը` անդրադառնալով ներդրումների ցուցանիշին:
«Այս տարվա ցուցանիշը դեռևս այն չէ, որ մենք ունենք մեր նպատակներում, բայց մենք վստահ ենք, որ 2020 թվականը էապես տարբեր է լինելու: Այսինքն՝ 2019-ը մոտավորապես կլինի նույն կերպ, ինչպես եղել է 2018-ը և 2017-ը, սակայն 2020-ը կլինի արդեն էապես ավելի լավ ներդրումային ցուցանշով ամփոփված տարի»,-ասաց նա:
Ինչ վերաբերում է հարցին, թե տարածաշրջանի լարվածությունը կազդի արդյոք ներդրումների վրա, նախարարը պատասխանեց. «Մենք հուսով ենք, որ Իրանի հետ կապված լարվածությունը շատ արագ կհանգուցալուծվի, և դեպքերը այնպես կզարգանան, որ դրանք ոչ միայն Հայաստանի, այլ նաև ընդհանրապես տարածաշրջանի համար կխոստանան միջին ժամկետ հուսալի հեռանկար, բայց մենք կածում ենք, որ Հայաստանի վերաբերյալ որոշումներ կայացնելու տեսանկյունից ձեր նշած գործոնը չի կարող էական խոչընդոտ հանդիսանալ»,-ասաց նա:
Չնայած դրան՝ Տիգրան Խաչատրյանը նշեց, որ դեպի Իրան առևտուրը դեռ որոշ ժամանակ չի ունենա այն ծավալները, որ պոտենցիալն է ենթադրում, սակայն Հայաստանը ԵԱՏՄ անդամ մաս է կազմում և կանխատեսելի միջավայր է ներկայացնում եվրոպական ներդրողների համար: