Զուգարանաշինությամբ իրականացնենք տնտեսական հեղափոխությունը
Զուգարանները կարեւոր են: Դրանք կարեւոր նշանակություն են ունեցել հին Հայաստանում, Պարսկաստանում, անգամ Հռոմում: Զուգարանները պետությունների դեմքն էին:
Առանց լավ զուգարանների անհնար է ոչ տնտեսություն զարգացնել, ոչ էլ զբոսաշրջություն: Հատկապես անթույլատրելի է վատ զուգարաններ ունենալ ոսկեզոծ աթոռներով ռեստորաններում, քանի որ ազգաբնակչությունը եւ զբոսաշրջիկները սիրում են լինել հենց նման հաստատություններում:
Ոչինչ, որ, օրինակ, Երեւան-Գյումրի ճանապարհին անգամ քանդված զուգարաններ չկան կամ եթե կան էլ, ապա միայն հեռավոր նմանություն ունեն զուգարանին: Անգամ ոչ մի նշանակություն չունի, որ Արմավիրի ավտոկայանի զուգարանը մի պատ է, որն ընդամենը պետք է շրջանցել եւ անցնել հետնամասի դալդա տեղը:
Շեշտը պետք է դնել միայն ռեստորանների վրա, քանի որ զուգարանները թույլ կտան դրանց սեփականատերերին տուգանել եւ անգամ ձերբակալել: Զուգարանը չի համապատասխանում նորմերին՝ տուգանք, ձերբակալում, կալանավորում:
Կարելի է ներգրավել հասարակ քաղաքացիներին, որոնք հեռախոսներով զինված կմտնեն ռեստորանների զուգարաններ եւ կլուսանկարահանեն, կտեսանկարահանեն եւ նյութերը կուղարկեն համապատասխան մարմիններին: Երջանիկ կյանքն ապահովված է:
Աննա Բաղդասարյան
Top-News.am